Read turkana Ngieosio 143 Bible Online

Ngieosio 143 - turkana bible

Ngieosio 143

¹(Eeos a Daudi) Ekapolon Akuj, kiira akilip kang! Kotere ateneanut kon, kiira eger lo kemaimaea iyong. Tatachu akilip kang ani iraakar iyong na kimunoi.

² Nyiitubok ekasuban etich kon ngakiro kainyo emam itwaan nyesechit alongaren kon.

³Kewap ayong emoit kang kachakaki kwap kepudaa. Kainiki lojela lokirion chuch, kikwaanikin ayong ka lu kolong atoakete a angorot.

⁴Keloo ayong noi. Erakar atoana kotere ebuloi.

⁵Etamunit ngirwa lu adaun. Etamanari daang na isubi iyong. Etamuununi na asuba ngakan kon daang.

⁶Kebakinit iyong ngakan elipit. Iitanit etau kang iyong loger lo iitanitotor ngalup nakoonok ngakipi.

⁷Ee Ekapolon Akuj, tatachu ngakiro kang atipei. Kangopiki ayong ni etori. Wara nyikidukak ayong, sodi nyikikwaanikin ayong ka lu eloose nia ngikatoak.

⁸Kisitamunae nataparach ngakiro a amina kon ana nyedaun, kainyo kegieno ayong iyong. Kidodikinae erot lo etori, kainyo kalemikinit ayong iyong etau kang.

⁹Ee Ekapolon Akuj, toyuunae alomoe kang, kainyo amotuno nikon akimech.

¹⁰Irai iyong Akuj kang. Kitatamae akisub na isaki iyong! Kimiek etau kon loajokon, katorik alorot alolapat.

¹¹Ekapolon Akuj, toyuunae ayong loger lo kolong ilimunio iyong. Toyuunae alochan kang ani ijokia iyong.

¹²Kona kiminar iyong ayong, taar ngimoe kang. Tomunya ngimoe kang daang, kainyo arai ayong ekasuban etich kon.