Read turkana Ngieosio 144 Bible Online

Ngieosio 144 - turkana bible

Ngieosio 144

¹(Eeos a Daudi) Kipuroe Ekapolon Akuj, ataaba nakayuunit ayong. Ketatami ngesi ayong akiyen ejie nabo ketenit ayong atojio.

²Ngesi erai ataaba kang, ka awas nakaagongon. Ngesi amechi ayong, tarai ekayuunan. Erai ngesi aupwal kang na egieno ayong. Idwangi ngesi ngibukui pena kwap kang.

³ Ekapolon Akuj, nyo mono itwaan itamitor iyong ngakiro keng? Nyo mono lokookeng a itwaan imisitor iyong?

⁴Ikoni itwaan akianget, ikote ngirwa keng etorube lo elosi.

⁵Ee Ekapolon Akuj, tapak adis totiyaun! Tatap ngimoru topuruut!

⁶Kisimileau akwap topeta ngimoe kon. Toguma ngimalea a amod kipungaros kesi.

⁷Kitorwaa akan kon alokidiama, kiriu ayong anakipi anatuluk, kitoyuu. Toyuunae anakan a ngitunga a akwap anache,

⁸alu isudete ngakiro nabo erai tani akikong kech alioko.

⁹Ee Akuj, kaeokini iyong eeos lokitetet. Eturukini ayong agita katoeonok iyong.

¹⁰Iyong ebwangeta ngikapolok ngimoe kech, sodi toyuu ekasuban etich kon Daudi.

¹¹Toyuunae alomoe alukamoitanak. Toyuunae anakan a ngitunga a akwap anache, alu isudete ngakiro nabo erai tani akikong kech alioko.

¹²Kimiek talokookosi alosorokane kech kikokis ngikito lu erupunete togogongioto. Kimiek tanakookosi kikokis ngapirio nakaagongok itisirito ngikwaasea a akai a ekapolon.

¹³Kimiek ngikerui kosi kilelebun pich ngalemet nagelagelae. Kimiek ngamesekin kosi toureta ngimesekin lukaalak anachokor.

¹⁴Kimiek ngaatuk kosi totuma lokojokon. Nyiiyecha kori nyeechakut ngitak. Nyeemin akuutere lorotin a ngirerea yok.

¹⁵Epiaritae ngitunga lu aanyut ngakiro na ikote nguna. Epiaritae ngitunga lu eraakasi Ekapolon Akuj erai Akuj kech!