Read turkana Ngieosio 145 Bible Online

Ngieosio 145 - turkana bible

Ngieosio 145

¹(Eeos a Daudi loa ekipur.) Kekusi iyong, ee Akuj kang ka ekapolon kang. Kabuakini iyong alakara nakajik.

²Kabuakini iyong alakara akolongit daang. Kepuruuni iyong nakajik.

³Epol Ekapolon Akuj, ejoikinit ipuruunio noi. Kikuruwori akiyen etiae a apolou keng.

⁴Ipuruunio ngitichisio kon napei analesit a apei kikobakin nache. Elimorete ngitunga ngitichisio kon luationok.

⁵Iruorosi ngakiro a ajakaanut ka asir kon. Etamanari ayong ngitichisio kon lukitalarete.

⁶Iruorosi ngitunga ngakiro a ngitichisio kon alukationok. Nakaneni alimori ayong apolou kon.

⁷Elimorete atamar ijok iyong lokojokon, nabo ikusete ateneanut kon.

⁸Emina Ekapolon Akuj tarai na ngisien. Nyengoyeene ngesi atipei nabo ileleba amina na nyedaun.

⁹Ejok Ekapolon Akuj ani eyakasi daang. Isienito ngesi ngitieng keng daang.

¹⁰Ee Ekapolon Akuj, kipuruunete iyong ngisubuna kon daang. Kibuakinete iyong ngitunga kon daang alakara.

¹¹Iruorosi ngakiro a ajakaanut ka apolou kon. Elimorete ngakiro a agogongu kon.

¹²Sodi toyeneta ngitunga daang ngitichisio kon lukationok, ka asir nakebusean a apolou kon.

¹³Erai apolou kon akajik. Erubi apolou kon analesea kadaang. Iyookini Ekapolon Akuj ngakichiket keng daang. Ejok ibore ni esubi ngesi daang.

¹⁴Ingaranakini Ekapolon Akuj daang lu eyakasi lochan. Ikeuni ngesi lu adakarosi.

¹⁵Kikienyikinito iyong ngakonyen a ngiborei kadaang, nakaneni iinanakini iyong kesi akimuj esaa lo iitanitotor.

¹⁶Iinanakini iyong kesi akimuj na itemokino kimwoko kesi daang.

¹⁷Etenoono Ekapolon Akuj ana esubi kadaang. Ejok ana esubi kadaang.

¹⁸Eapi Ekapolon Akuj ani eyakasi daang lu enyarito ngesi, daang lu enyarito ngesi na iteni.

¹⁹Itaanyuni ngesi lu ekerito ngesi ibore ni iitanito. Iirari ngesi akigoro kech toyuu kesi.

²⁰Iyoki Ekapolon Akuj daang lu eminasi ngesi nakaneni emunyari luaronok daang.

²¹Epuruuni ayong Ekapolon Akuj jiik. Kimiekisi ngisubuna keng daang kipuruut ekiro keng lo italeuno, napei tokona jik.