Read turkana Ngieosio 147 Bible Online

Ngieosio 147 - turkana bible

Ngieosio 147

¹Kipuroe Ekapolon Akuj! Ejok aeokin ipuruunit Akuj yok. Kainyo ejok ngesi nabo itemokino akipuruun ngesi.

²Esubakinit Ekapolon Akuj Yerusalem. Ebuuni ngirikon.

³Itangalekini ngesi lu esurur ngitai toen ngajemei kech.

⁴Eyeni ngesi etiae a ngikanyer, elimokinit epei kech daang ekiro.

⁵Epolot Ekapolon Akuj togogong. Emam kona itemio aosou keng.

⁶Ikeuni Ekapolon Akuj lu itiditeuna, nakaneni echakakini luaronok napua.

⁷Toeokisi Ekapolon Akuj ngieosio lu ipuruore. Tarama agita ieokinito Akuj yok.

⁸Epetakinit ngesi ngidowon nadis. Eyaunit ngesi akiru nakwap kiturup nginyia alomukur.

⁹Einanakini ngibaren akimuj kech, kitani ngitak a ngikuruka na erukinioto.

¹⁰Nyejoikinit ngesi agogongu a ngangolei, kori nyeminarit ajwonu a ngasigerea.

¹¹Nakaneni eminarito lu ekerito ngesi, ngitunga lu igienosi amina keng na nyedaun.

¹²Ee Yerusalem, kipuruu Ekapolon Akuj! Ee Sion, kipuruu Akuj kon!

¹³Itogogongi ngesi ngidorin kon. Epiari ngitunga kon.

¹⁴Ewaak ekisil lokukuoru a akwap kon. Kitanyami iyong ngakanoi naajokak noi.

¹⁵Edunguni ngesi akiroit anakwap, tosubakin akiroit ngina atipei.

¹⁶Epetakini ngesi eloch lo ipukit loger a eworu alodapal, ka apetar eloch loger a apua.

¹⁷Eyauni ngamoru a akiru naapolok na etia ngikeal. Ngae enaikini akatorot nakaalimon noi ngina?

¹⁸Ani erumor todung akiroit, tokeiasi ngamoru nguna. Eyauni ngesi ekuwam, toleleasi ngakipi.

¹⁹Elimokini ngesi Yakobo akiroit keng. Elimokini Isirael ngakitatamet ka ngitalio keng.

²⁰Nyesuba ngesi ngakiro na ikote nguna alobukui aluche. Nyeyenete kesi ngitalio keng. Kipuroe Ekapolon Akuj!