Read turkana Ngieosio 148 Bible Online

Ngieosio 148 - turkana bible

Ngieosio 148

¹Kipuroe Ekapolon Akuj! Kipuruutu Ekapolon Akuj anadis, kipuruutu esi lu ibooyete kaina alokidiama.

²Esi ngimalaikae keng daang, kipuruutu ngesi. Esi ajore a adis daang, kipuruutu ngesi.

³Esi akolong ka elap, kipuruutu ngesi. Esi ngikanyer daang lu inokete, kipuruutu ngesi.

⁴Iyong adis na alokidiama, kipuruu ngesi. Esi ngakipi na iyakasi kidiama adis, kipuruutu ngesi.

⁵Ejoikina ipuruunio ekiro a Ekapolon Akuj, kainyo adunguni ngesi akiroit, tosubakinae ibore daang.

⁶Akiroit na adunguni ngesi ngina, ngesi ewaakinere ibore daang ni eyei jik. Erubi etal keng jik.

⁷Kipuruutu Ekapolon Akuj anakwap, iyong etiengit a anam ka ngitoroi.

⁸Esi akim ka ngamoru a akiru, ka eloch ta ngidowon, kipuruutu ngesi. Iyong ekuwam loapolon lo iyookini na edungunit Akuj, kipuruu ngesi.

⁹Esi ngimukur ka ngimoru, ka ngikito a ageor ta ngamon, kipuruutu ngesi.

¹⁰Esi ngitieng a moding ka ngibaren daang, kipuruutu ngesi. Esi ngiborei lu iliato ka ngikieny daang, kipuruutu ngesi.

¹¹Esi ngikapolok a ngakwapea ka ngitunga daang, kipuruutu ngesi. Esi talokookeng a ngikapolok ka ngikapolok luche daang, kipuruutu ngesi.

¹²Esi ngapesur ka ngisapa, kipuruutu ngesi. Esi ngitunga lumojong ka ngide dang, kipuruutu ngesi.

¹³Kimiekisi kesi daang kipuruut ekiro a Ekapolon Akuj. Epol ekiro keng akidwang ngirora luche daang. Ipororit akibuseanu keng akwap ka adis.

¹⁴Eapi ebukut keng Isirael alo diyete keng. Esikok ngesi etogogong. Ipuruunito ngesi ngitunga keng daang lu emunoi. Kipuroe Ekapolon Akuj!