Read turkana Ngieosio 18 Bible Online

Ngieosio 18 - turkana bible

Ngieosio 18

¹(Erai eeos logo lo aeokini Daudi lo arai ekasuban etich a Ekapolon Akuj, na ayuunea Ekapolon Akuj ngesi ani a Saul ka ngimoe keng.) Kamina ayong iyong Ekapolon Akuj! Iyong irai ekaikinan kang.

²Ekapolon Akuj erai ataaba kang, ka awas kang nakaagongon, tarai akayuunan kang. Erai Akuj kang, tarai ataaba kang na amatakin ayong. Egaa ayong ngesi loger a aupwal, sodi eboikinor akaalimon.

³Anyarae ayong Ekapolon Akuj, lo ejoikinit ipuruunio, katoyuu ngesi ayong alomoe kang!

⁴Abu akitu katorwakin ayong, kilapun ngitoroi a nginyas nikang.

⁵Kerudakin ayong akitu, katolokite aliel.

⁶Atanyara ayong Ekapolon Akuj alochan kang. Egoronok ayong Akuj kang abala kengarak. Kiira ngesi etoil kang alokai keng. Topupok ngesi akigoro kang na asakea kengarakin.

⁷Abu akwap tamaranik ka arikirikokin. Kuukuukokin ngateak a ngimoru ka arikirikokin, ani angoitor Akuj!

⁸Kidauu apuru alokumes keng, sodi akim nakariran ka ngatotol na enokete topudut anakituk keng.

⁹Apaki ngesi adis totiyaun, eyei edou lo ilirakina kwap ngakejen keng.

¹⁰Aporori ngesi atipei a ibore ani a ngabeben. Alosi eyei nabeben a ekuwam.

¹¹Abutakin ngesi aribu. Emukito ngesi ngidowon luapolok, lu eleleba ngakipi.

¹²Na abunio ngesi kinwaku akimilea. Ani erumor totupuut ngamoru a akiru ka ngasarae eponito alodou aloapolon.

¹³Sodi togirok Ekapolon Akuj anadis, kiirarae etoil a Akuj ana Epol Noi. Talakak ngamoru a akiru ka akim.

¹⁴Toguma ngesi ngimalea keng a akau kieala ngimoe keng. Kirita ngesi kesi a akimilea.

¹⁵Apon akook a anam kitoonoi deu, sodi talacharae ngateak a akwap, na ekilakinea Ekapolon Akuj ngimoe keng, sodi kirurumakinea kesi engoit.

¹⁶Abu Ekapolon Akuj na eyei kidiama tanangu kwap katoting ayong. Keriu ngesi ayong anakipi anatuluk.

¹⁷Kayuuni ngesi ayong alomoe kang alukajwok noi, ka daang lu karemokino ayong. Agogong kesi noi akidwang ayong.

¹⁸Ketijikinete kesi ayong na ayakar lochan, nakaneni katoik ayong Ekapolon Akuj.

¹⁹Kengarakini ngesi ayong alochan. Kayuuni ngesi ayong kainyo alakara kotere ayong.

²⁰Ketaanyunit ayong Ekapolon Akuj ekeny ajokon kainyo asubi ayong ngakiro na iyookino. Kapiarit ngesi ayong ani emamakar ayong ibore asechit.

²¹Ewapit ayong Etal a Ekapolon Akuj. Eringa ayong nyereiara wache ani eyei Akuj kang.

²²Ewapit ayong ngakiro keng daang. Nyengero akiwap ngakitatamet keng.

²³Eyeni ngesi atamar nyasechit ayong. Awou ayong akisub naaronok.

²⁴Kotere ngakiro nguna, ketaanyu ngesi ayong ekeny ajokon, ani eyenea ngesi atamar atenoono ayong. Ani emamakar ibore asechit alongaren keng.

²⁵Ekapolon Akuj, imuno iyong lu kimunosi iyong, nabo nyisechit iyong ani eyakasi lu nyesechito.

²⁶Ikiuna iyong ani eyakasi ngulu ikiuna. Ios iyong ani a ngikamodeanak.

²⁷Iyuuni iyong lu itiditeuna, nakaneni itiditeuni lu inisasi.

²⁸Ekapolon Akuj, iyong kare inokakinit ataa kang. Akuj kang, iyong itwarakini aribu kang.

²⁹Kitaanyuni iyong ayong ngikilinga lu etijio ngimoe kang, ka agogongu na edwangea lu ketepegete.

³⁰Akuj naga, ikiuna na esubi ngesi! Eraakasi ngakiro keng ngaka iteni! Ikoni ngesi aupwal ani eyakasi daang lu esakete kitoyuu ngesi.

³¹Kainyo ngae erai Akuj? Ikwa meere Ekapolon Akuj a? Ani ngae erai ataaba? Ikwa meere Akuj yok a?

³²Erai ngesi Akuj naketogogongi ayong. Itiliwori ngesi erot kang lo emam ibore niaronon eyei.

³³ Itenikini ngesi ngakejen kang kikokis na agete. Kachoikini ngesi ayong niajokon alomoru.

³⁴Ketatami ngesi ayong ejie, sodi atotingea ayong akau nakaagongon noi.

³⁵Ee Ekapolon Akuj, kiinak iyong ayong aupwal na ayuunor. Kegangit ayong akan kon na a aloteten. Aliwor ayong lokayenikinitae, ani kingarakinitor iyong.

³⁶Kiratak iyong ayong nyekerumun, nakaneni nyedakara ayong jik.

³⁷Erisi ayong ngimoe kang sodi erum. Nyaisikini ayong kesi tanang amunyari.

³⁸Arami ayong kesi atowan, sodi towout anyoun. Edakakinosi kesi nakejen kang.

³⁹Kiinanakini iyong ayong ngikilinga lu ajio, sodi edwang ngimoe kang.

⁴⁰Isipungari iyong ngimoe kang ani anikang. Amunyari ayong lu karemokino ayong.

⁴¹Igorosi kesi esakete atamar kingarakin, nakaneni emam itwaan ingarakini kesi. Enyaraate kesi Ekapolon Akuj, nakaneni nyetachi ngesi ngakiro kech.

⁴²Eriekini ayong kesi kikokis apua na ekutari ekuwam. Epudae ayong kesi loger a echoto alo eyei lorotin.

⁴³Kiyuuni iyong ayong alotunga alu kangerito. Sodi kitiliwo ayong ekapolon a ngibukui. Ngitunga lu kolong sek peayeni ayong, aliworosi tokona lu apolokinit ayong.

⁴⁴Ngitunga a akwap anache, eriedikete alongaren kang. Nairareta kesi ngakiro kang, kiwapakis.

⁴⁵Elilimiyorete kesi sodi pot emaranete anawasea kech.

⁴⁶Eyari Ekapolon Akuj! Kipuroe ataaba kang! Kipuroe apolou a Akuj ana kayuuni ayong.

⁴⁷Edwangi ayong ngimoe kang kotere ngesi. Etikiyori ngesi ngibukui lu apolokinit ayong,

⁴⁸nakaneni katoyuu ayong alomoe kang. Ee Ekapolon Akuj, edwangi ayong ngimoe kang kotere iyong, dio kitoyuu iyong ayong alotunga alukamoitanak.

⁴⁹ Kotere nguna, kepuruuni iyong alobukui. Ekusi ayong ekiro kon.

⁵⁰Ekapolon lo erai eka Akuj, isidwangi Akuj ngesi ngimoe keng lokojokon. Idodikini Akuj lo aseu amina na nyedaun. Idodikini Daudi ka ngalesea keng jik.