Read turkana Ngieosio 19 Bible Online

Ngieosio 19 - turkana bible

Ngieosio 19

¹(Eeos a Daudi) Isileereunit adis apolou a Akuj! Elimorit dir ibore ni asubi ngesi!

²Alimuni apaaran apei akiroit tolimok apaaran na etupit ngesi. Tolimu akolongit apei aosou tolimok akolongit na etupit ngesi.

³Emam ekiruor, emam tani ngakiro. Emam etoil epupio.

⁴ Tani ikoni neni dang, apetar ekiruor kech nakwap daang. Ani ngakiro kech, epupio alosal a akwap. Ewaakini kolong Akuj awi a akolong nadis.

⁵Epuduni akolong anawi keng loger a ekile alo iuta, loger a ekakeran alo ebobokinit abolo anakerit.

⁶Ipiripiruuni alowae a epei, kirimo tanang lowae loche. Emam ibore ebuchar anamonis keng.

⁷Ikiuna etal a Ekapolon Akuj. Itaanyuni itwaan ngikilinga lukiteat. Eraakasi na edunguni Ekapolon Akuj na emunoi. Itoosunete lu emam ibore eyenete.

⁸Iyookino ngitalio a Ekapolon Akuj, italakarete ngitai alu iwapete. Eriyan ngitalio lu edungunit Ekapolon Akuj, itoosunete itwaan.

⁹Ejok akerit Ekapolon Akuj, erubi jik. Iyookino ngakitatamet a Ekapolon Akuj, eraakasi na etenooko.

¹⁰Ejokak kesi noi akidwang tani egolit loajokon noi. Ebobok akidwang akimiet a ao naajokon noi.

¹¹Ketoosunete ayong ekasuban etich kon. Aanyunit ayong ekeny ajokon ani ewapitor kesi.

¹²Emam itwaan eanyungari na ichwangakinit ngesi ilope. Toyuunae kare ayong Ekapolon Akuj alosech alu nyayeni!

¹³Kiratakinae ayong anasechesea ana kiyechakina. Wara kesi nyakapolokis ayong. Ani kikok neni atoliwor ayong lo ekiuna lo emam akisech eyei.

¹⁴Kimiek ngakiro a akituk kang, ka ngitamen a etau kang, kitojoikis iyong. Ee Ekapolon Akuj, ataaba kang ka ekangarunan!