Read turkana Ngieosio 22 Bible Online

Ngieosio 22 - turkana bible

Ngieosio 22

¹(Eeos a Daudi) Akuj kang, Akuj kang, nyo kiisikinea? Nyo ichadaror iyong pekingarakinea? Nyo ichadaror anakiro ana kegoronokinio?

²Akuj kang! Egoro ayong naparan, nakaneni nyipupokini iyong ngakiro kang. Egoro ayong nakwaare, nakaneni nyepote ngaju jik.

³Tani ikoni neni dang, irai iyong lo italeuno. Iyong ngesi kipuruunito Ngisirael.

⁴Kigienokino iyong taapaakosi. Kigienokino kesi iyong, toyuu iyong kesi.

⁵Kigoronokinete kesi iyong toyuunos alochan. Kigienokino kesi iyong, kotere ngakiro nguna, nyiruma kesi ngileech.

⁶Nakaneni nyeringa ayong arai itwaan, arai ekurut. Kemenyarit ayong itwaan daang kakianar.

⁷ Kemielanakinete daang ngangajepa, kemungumungeta ngakies, kenyaiyonorete.

⁸Ebalasi kesi, “Igienokino kolong iyong Ekapolon Akuj. Nyo pekiyuunea ngesi iyong? Ani kimina iyong Ekapolon Akuj, nyo pekingarakinea ngesi iyong?”

⁹Ekapolon Akuj, iyong kipuduni ayong anakook a itiokang, kitochoik ngirwa lu anakea.

¹⁰Kegieno ayong iyong napei kolong kedounere. Napei kolong kedounere ayong, irai iyong Akuj kang.

¹¹Nyiichadakin anikang! Iruduna ngichan, tamam itwaan kengarakini ayong.

¹²Kerikaunito ayong ngimoe lukaalak loger a ngimongin. Keriamito loger a ngimongin alukaadengak a akwap a Bachan!

¹³Engaarito kesi ngakituk loger a ngingatunyo, irurumaate esakete anyilinyilaar.

¹⁴Adaunosi ngikilinga kang loger a ngakipi ana abukokinosi nalup. Edotunosi ngakoyo kang daang. Ikoni etau kang aarwak na akeia.

¹⁵Aono edokole[4] kang deu loger a abelekek. Etapakina angajep kang nangirit. Kimiek iyong ayong anapua eridi.

¹⁶Kerikaunit ayong ajore a ngirukooi. Idooriunito daang nikang loger a atwom a ngingokwo. Kapedopedosi[5] ngakan ka ngakejen.

¹⁷Edong ayong arai ngakoyo bon. Kengolikinete ayong ngimoe kang katokianatar.

¹⁸ Ileeto kesi ngiworui kang ngikilees, sodi tokoranakinos.

¹⁹Ekapolon Akuj, nyiichadakin kare anikang! Iyong irai akengarakinan kang. Bua atipei toyuunae ayong.

²⁰Toyuunae ayong alokileng. Toyuunae alongokwo kalu!

²¹Toyuunae ayong anakituk a ngingatunyo kalu. Emam ayong ibore asubakini alongaren ngikosowa lugu.

²² Alimokini ayong ngitunga kang na isub iyong. Kepuruuni iyong ani iriamito kesi.

²³“Kipuruutu ngesi, esi ngikasubak etich a Ekapolon Akuj! Kidodikisi ngesi arimatoi, esi ngalesea a Yakobo! Kilipa ngesi ikerito, esi Ngisirael!

²⁴Nyimenyarit ngesi apalagu a ngikebootok, kori nyejamuarit ngichan kech. Nyibongokini ngesi kesi akau, pearai iikini kesi na enyaraata ngesi esakete atamar kingarakin.”

²⁵Kepuruuni ayong iyong alokiriam a ngitunga alukaalak. Eyookini ayong ngakikongiet kang alongaren lu kikerito iyong.

²⁶Enyamete ngikebootok kimwoko. Ngulu epote ni Ekapolon Akuj, ipuruunete ngesi. Agasi atamar tajakaana kesi jik!

²⁷Itamunete ngibukui daang Ekapolon Akuj. Ereeunosi daang nikeng alowaitin kadaang a ngakwapea. Ilipete ngesi ngibukui daang.

²⁸Kainyo erai Ekapolon Akuj ekapolon. Epolokinit ngesi ngibukui.

²⁹Ngulu inisasi daang eriedikete alongaren keng. Ngitunga daang lu etoakeenete eriedikete alongaren keng.

³⁰Ngalesea na isidiunosi esubete etich keng. Elimonokinete ngitunga ngalesea na isidiunosi ngakiro a Ekapolon.

³¹Ngitunga lu eringa nyidouno, elimokinio kona, “Ayuuni Ekapolon Akuj ngitunga keng.”