Read turkana Ngieosio 25 Bible Online

Ngieosio 25 - turkana bible

Ngieosio 25

¹(Eeos a Daudi) Ekapolon Akuj, abunit ayong nikon a etau kang kadaang.

²Akuj kang, kegieno ayong iyong, nyikimiek ayong kerumete ngileech, nyeelakarotor ngimoe kang ani kedwangere ayong!

³Nyirumete ngileech daang lu kigienosi iyong. Nakaneni lu imakounito kingerito iyong, kesi irumete ngileech.

⁴Kidodikinae ngirotin kon Ekapolon Akuj, kitoyenae ayong ngirotin kon.

⁵Torikoe anakiro kon ana iteni sodi kitatam, kainyo irai iyong Akuj nakiyuunit ayong. Iyong kedarit apaaran juui.

⁶Kitamu akisienut kon Ekapolon Akuj, ka amina kon na nyedaun, na idodiunit iyong napei kolong kanuan.

⁷Torimakinae ngasechesea ka ngakiro na echwangakinit ayong alosorokane kang. Kitamunae ayong a amina kon ana nyedaun, kotere ajokis kon Ekapolon Akuj!

⁸Kona eraakar Ekapolon Akuj naajokon totenoono, itatami ngesi ngikasechak erot lo iwapete.

⁹Erikit ngesi lu itiditeuna ana iyookino, sodi kitatam kesi erot keng.

¹⁰Eriki Ekapolon Akuj lu irichakinete achamunet keng ka ngakiro, torik a amina ka amuno.

¹¹Kirichak achamunet kon Ekapolon Akuj, torimak ngasechesea kang, kainyo elalak.

¹²Itwaan ni erima Ekapolon Akuj itatama anikeng erot lo ejoikinit iwapi.

¹³Itwaan ni ikoni neni, ejokeanarosi ngakiro nakeng jiik. Irumete ngide keng akwap.

¹⁴Eelosi Ekapolon Akuj ka lu iwapito ngakiro keng. Iteyeneene ngesi kesi achamunet keng.

¹⁵Akienyikinit ayong Ekapolon Akuj jiik asaki kengarak. Ngesi bon kayuuni ayong aloloit.

¹⁶Toreeun nikang Ekapolon Akuj, kitorimak, kainyo etasiono ayong apalag.

¹⁷Kisiangunae ayong anakialolong kang sodi kitoyuu anariaba kang kadaang.

¹⁸Kingolik ariaba kang ka ngichan. Kitorimak ngasechesea kang daang.

¹⁹Taanyunga eger lo elalaketa ngimoe kang. Kingolik eger lo karemitotor ayong.

²⁰Kirichak eboyor kang kitoyuu. Wara nyekeruma ngileech, kainyo kegieno ayong iyong.

²¹Agasi ajokis ka ateneanut kerichut, kainyo kedarit ayong iyong.

²²Akuj, toyuu kare Ngisirael lu eraakasi ngitunga kon. Toyuu kesi alochan kech kadaang.