Read turkana Ngieosio 30 Bible Online

Ngieosio 30 - turkana bible

Ngieosio 30

¹(Eeos lo italeunere akai a Akuj. Eeos a Daudi) Kepuruuni ayong iyong Ekapolon Akuj kainyo kikeu iyong ayong. Iratak iyong ngimoe kang nyekechurotor ayong.

²Ekapolon Akuj, Akuj kang, kegoronokini ayong iyong asaki kingarak, sodi kitangalek iyong edeke kang.

³Kiratak iyong ayong anakipany. Kibuak akiyar kang, arai ayong ekalomaran ni eyakasi ngikatoak.

⁴Kikuta Ekapolon Akuj esi daang ngitunga keng lu kimunoi! Kitamu ngakiro na asub lo italeuno, tobuak ngesi alakara!

⁵Edit ni engoitor ngesi, nakaneni erubi ajokis keng jik. Epedorete ngakiyo aleleun nakwaare, ani nataparach min alakara.

⁶Ani eliwor ayong, atolimu anajakaanut kang atama, “Nyekedwangio ayong jik.”

⁷Ijok iyong anikang Ekapolon Akuj. Ibu iyong kisikok ayong awas a emoru. Ani idai iyong ereet kon anikang, atoem ayong.

⁸Abu ayong katanyar iyong, Ekapolon Akuj. Kemaima ayong iyong asaki kingarak atama,

⁹“Nyo ingatari iyong katoana ayong? Nyo ebachit iriamuni iyong kalot ayong nakipany? Epedorete lu aliworosi apua akipuruun iyong a? Epedorete kesi alimor amuno kon a?

¹⁰Topupok kare Ekapolon Akuj, kisien! Ekapolon Akuj, toliwor kare akengarakinan kang!”

¹¹Iloch iyong asutonokin kang aliwor alakara ka akichuro. Ilema iyong akialolong kang sodi kilelebik ayong alakara.

¹²Kotere ngakiro nguna, nyelilingi ayong. Kekusi ayong iyong. Ekapolon Akuj, irai iyong Akuj kang. Kabuakini ayong iyong alakara jik.