Read turkana Ngieosio 33 Bible Online

Ngieosio 33 - turkana bible

Ngieosio 33

¹Esi daang lu itenooko, kiremasi ilakara kotere na asubaki Ekapolon Akuj. Kipuro ngesi, esi daang lu iwapito ngakiro keng.

²Tobuakisi Ekapolon Akuj alakara a ngagitae. Kikuta ngesi a ngagitae ana ngiunoi a ngitomon.

³Toeokisi ngesi eeos lokitetet, tarama agita a achwaanu, sodi kiremasi a alakara!

⁴Eraakasi ngakiro a Ekapolon Akuj ngaka iteni, igienokinoi ngakiro na esubi ngesi daang.

⁵Emina Ekapolon Akuj ateneanut ka akitiriyan ngakiro. Ileleba amina keng na nyedaun akwap wadaang.

⁶Asubakini Ekapolon Akuj adis a ngakiro ana adunguni ngesi. Asubunio ngiboro daang lua adis a ngakiro ana alimuni ngesi.

⁷Achunakini ngesi ngakipi a nganamea wapei. Ani ngitoroi anituluk togolok lokerui.

⁸Kipeyonokis ngakwapea daang Ekapolon Akuj! Esi ngitunga daang a ngakwapea, tokera ngesi!

⁹Na eruorikinea ngesi, tosubunae akwap daang. Ani edunguni ngesi, tatakanu ibore daang.

¹⁰Ngakiro na etukito ngibukui, itiliwori Ekapolon Akuj ngapasiek. Ibatanari Ekapolon Akuj kesi nyeesubakis na ereto.

¹¹Ngakiro na ereat Ekapolon Akuj, erubete jik. Ngakiro a etau keng, irukete ka ngalesea daang.

¹²Epiaritae ebukut lo erai Ekapolon Akuj Akuj kech. Epiaritae ngitunga lu aseu ngesi tarata ngikeng!

¹³Ekienyuuni Ekapolon Akuj kwap eyei kidiama nadis sodi taanyunga ngitunga daang.

¹⁴Ani ibooyo ngesi alokicholong a apolou kaina, ekienyuuni ngesi kwap taanyunga daang lu eyakasi nakwap.

¹⁵Ngesi irokuununi ngitamen kech daang, nabo eyeni ibore daang ni esubete kesi.

¹⁶Meere alalau a ngasigerea eyuuni ekapolon. Nyidwangi ekajwon ngimoe keng kotere ajwonu keng.

¹⁷Erai angole a ejie aka pas esakere akidwang ngimoe. Nyeyuuni achigirir keng itwaan.

¹⁸Echoikinit Ekapolon Akuj lu ekerito ngesi, ka lu igienosi amina keng na nyedaun.

¹⁹Eyuuni ngesi kesi anakitu. Iteyari ngesi kesi ngirwa lua eron a akoro.

²⁰Kigienokino ngoni Ekapolon Akuj. Ngesi kingarakini ngoni, toliwor aupwal yok.

²¹Ee robo, kilakara ngoni kotere ngesi. Kigieno ngoni ekiro keng lo italeuno.

²²Ekapolon Akuj, kimiek amina kon na nyedaun eruko ka sua, kona kigienor sua iyong.