Read turkana Ngieosio 34 Bible Online

Ngieosio 34 - turkana bible

Ngieosio 34

¹(Eeos a Daudi alo arotokini ani a Abimelek, na eyachakinitor atamar kakoporito ngikerep, sodi kitwarakinae.) Abuanakini ayong Ekapolon Akuj alakara jiik. Arubakini ayong alimit ekipur keng jiik.

²Epuruuni ayong ngesi ana asubaki. Kimiekisi lu ichiakiaritae kiirasi sodi talakaros!

³Atolimosi ngoni apolou a Ekapolon. Epuruutu ekiro keng aapei!

⁴Elipi ayong Ekapolon Akuj, kiik ngesi akilip kang. Katoyuu ngesi alobuloi kang kadaang.

⁵Eanyungarete lu ichiakiaritae ngesi talakaros. Nyirumete kesi ngileech jik.

⁶Ekaloikini itwaan ni eyei lochan Akuj, kiik Akuj ngesi, toyuu alochan keng kadaang.

⁷ Iyoki emalaikat lu ekerito Ekapolon Akuj, sodi toyuu kesi.

⁸Kiir kare toyen eger lo ejokia Ekapolon Akuj! Epiaritae lu eloose nikeng esakete atamar kitoyuun.

⁹Ngitunga a Ekapolon Akuj, tokera ngesi. Emam ibore engopikini lu ekerito Ekapolon Akuj!

¹⁰Tani ngingatunyo enyami akoro ani engopikinea akimuj. Nakaneni lu iwapito ngakiro a Ekapolon Akuj, emam ibore niajokon ni engopikini.

¹¹Potu ngisorok topupokisi, sodi ketatam ayong esi akiker Ekapolon Akuj.

¹²Isaki iyong akiboi eboyor loajokon a? Isaki iyong akiboi nikooyen ilakara?

¹³Kiratak angajep kon ani eyakasi naaronok ka akisud ngakiro.

¹⁴Toreeun ani eyakasi naaronok sodi tosub naajokak. Tasak ekisil kirichak a etau kon kadaang.

¹⁵Itee Ekapolon Akuj lu etenooko nabo epupi akigoro kech.

¹⁶ Engerit Ekapolon Akuj lu esubete naaronok, tolema kesi anakwap, tojongoto ngitunga akitamunit.

¹⁷Iirari Ekapolon Akuj ngakiro alu etenooko na enyaraata ngesi, toyuu kesi alochan kech kadaang.

¹⁸Eapi Ekapolon Akuj ani eyakasi lu esurur ngitai. Eyuuni lu alilimiyosi.

¹⁹Eanyuni lo etenoono ngichan lukaalak, nakaneni eyuuni Ekapolon Akuj ngesi alochan kangulu kadaang.

²⁰ Iyoki Ekapolon Akuj itwaan ni etenoono. Emam akoit keng tani apei na ebila.

²¹Emunyari aronis ngitunga. Irirao lu eremokino ngitunga lu etenooko.

²²Eyuuni Ekapolon Akuj ngitunga keng. Nyirirao lu ematarosi nikeng daang.