Read turkana Ngieosio 35 Bible Online

Ngieosio 35 - turkana bible

Ngieosio 35

¹(Eeos a Daudi) Ekapolon Akuj, kitopeg lu ketepegete ayong. Kitiji lu ketijiyete ayong!

²Tolem aupwal ka aep kon, bu kitoik.

³Kikea akwara ka amorok kon ani eyakasi lu kerisito ayong. Kichikakinae atamar kiyuuni iyong ayong.

⁴Kimiekisi lu esakete akiar ayong kidwangae, nabo kiruma ngileech! Kimiekisi ngulu katukuotor ayong tobuarae irumito ngileech kibilerite.

⁵Kimiekisi kikokis nginyia lu ekutarit ekuwam, na irisitor emalaikat a Ekapolon Akuj kesi!

⁶Kimiekisi erot kech toribok tarai lojurut, na irisitor kesi emalaikat a Ekapolon Akuj.

⁷Kainyo kalokakinito kesi ayong a ngiloi pas. Katobokakis akipany emam ibore asechit.

⁸Ituumwokinete kesi nginyas, irumunete kesi ngiloi kech tadakakinos nakipany kech a ngikulepek.

⁹Sodi atalakar ayong kotere Ekapolon Akuj. Alakar ayong kainyo kayuuni ngesi ayong.

¹⁰Elimokinete ngakoyo kang dang Ekapolon Akuj tamasi, “Iyong Ekapolon Akuj, emam iche ikwaan ka iyong! Iyuuni iyong lupalag alomaagor alu eyakasi ngikilinga, toyuu lukebootok ani eyakasi ngirukooi.”

¹¹Keruorotor ayong ngitunga luaronok alioko. Keriraate ayong a ngakiro ana nyayeni.

¹²Etachete naajokak asubi ayong kotere naaronok. Edong ayong alarakina.

¹³Tarai nakolong adeakakinotor kesi, atanap ayong ngikuniae edodiunit akialolong. Abu ayong atoroneene akimuj. Elip ayong ejuurui, kikungokin abokony natorobu,

¹⁴loger lo egoror lopaekang kori lokaatokang. Erim ayong akwap ealolongi, loger a itwaan ani igoro esutonokini kotere akitu a itiokeng.

¹⁵Ani aanyuni ayong ngichan, talakaros kesi daang, tochununos katokianatar. Kebungata ayong ngirukooi lupeayeni tongop itwaan iratakini!

¹⁶Ekote kesi ngitunga lu ekianatar ngikangwalak, katopochokis kesi ayong ngakonyen enyunyurasi.

¹⁷Ekapolon Akuj, irubakini iyong itee nguna ililingi tanang ori? Toyuunae ayong alojie kech. Toyuunae alongatunyo kangulu.

¹⁸Sodi katobuak iyong alakara anajore anakaalan. Kepuruuni ayong iyong anasepich a ngitunga.

¹⁹ Wara ngimoe kang luaronok ngulu nyakakianatar ayong. Wara lukaremokino ayong pas ngulu elakarosi ani aanyunitor ayong ngichan.

²⁰Nyiruorosi kesi ngakiro na epaalonu, pearai isudioto lu eminasi ekisil ngakiro.

²¹Kapaikinete ayong ngakiro ebalasi, “Yee, kitee sua ngakiro na isubi iyong!”

²²Nakaneni ianyunga iyong nguna Ekapolon Akuj. Nyiililing robo Ekapolon Akuj, nyiichadar anikang.

²³Bua kare Ekapolon toikinae ayong. Tonyou kare Akuj kang, kingolik ngakiro kang.

²⁴Ekapolon Akuj, Akuj kang, irai iyong na eteniyete ngakiro, kidodiu atamar nyasechit ayong. Nyiimiek ngimoe kang kakianatar ayong.

²⁵Nyiimiek kesi elomunete tamasi, “Yee, kisubak sua logo! Kilema nidikil.”

²⁶Kimiek lu elakara kotere ngichan kang, kidwangae daang kibiler. Daang lu ebalasi kijokak akidwang ayong, taanyut etimoi ka ngileech.

²⁷Ani ngulu esakete akiirar atamar emam ayong akisech, talakaros lokojokon noi toliwor ebalasi jiik, “Epol Ekapolon Akuj noi! Ejoikinit ngesi eboyor a ekasuban etich keng.”

²⁸Sodi atolimo ayong ateneanut kon, ka akipuruun iyong apaaran juui.