Read turkana Ngieosio 36 Bible Online

Ngieosio 36 - turkana bible

Ngieosio 36

¹(Eeos a Daudi, ekasuban etich a Ekapolon Akuj.) Isuruori akisech itwaan niaronon alotooma etau keng. Nyekeri itwaan ngini Akuj.

²Kona isoswar ngesi ilope ebala kayenikinitae noi, ebala ngesi kori nyeanyuni Akuj aronis keng, kirira.

³Ibore ni elimuni ngesi daang, erono, tarai nabo alioko. Apaliki ngesi akiwapit aosou ka akisub naajokak.

⁴Itami ngesi akisub naaronok esaa lo eperio. Emam ibore ni esubi ngesi ni ejok, nyengeri ngesi ibore niaronon.

⁵Ekapolon Akuj, enangit amina kon na nyedaun nadis, enangit amuno kon lodowon.

⁶Ikoni ateneanut kon ngimoru luapolok. Eger lo itubio iyong ngakiro, ikwaan ka nituluk a anam. Iyong kare, Ekapolon Akuj, iyuunit ngitunga ka ngitieng.

⁷Ee Akuj, ejok noi amina kon na nyedaun! Emotunosi ngitunga lotorube lo a ngabeben kon.

⁸Isimwoni kesi akimuj a awi kon. Itamasi iyong kesi anangolol a ajokis kon.

⁹Nikon isiakinitor akiyar daang. Kitee sua akicha kotere akicha kon.

¹⁰Torubak imina lu kiyenete iyong. Tosubea lu eteniyete ngitai naajokak.

¹¹Wara lu iwogasi nyakalosikis ayong. Wara ngitunga luaronok nyeketodokis ayong.

¹²Kingolik ni adakakinosi ngitunga luaronok. Eperete kesi kaneni, nyepedorete anyoun.