Read turkana Ngieosio 37 Bible Online

Ngieosio 37 - turkana bible

Ngieosio 37

¹(Eeos a Daudi) Wara nyiimaran kotere ngitunga luaronok, wara nyikiting etereku kotere lu esubete naaronok!

²Kainyo engopiarete kesi atipei loger a nginyia, tooniyosi loger a ngikito alukalibak.

³Kigienokin Ekapolon Akuj, tosub naajokak, sodi kiboikinor nakwap akaalimon.

⁴Tasak alakara ani a Ekapolon Akuj, kiinak ngesi iyong ibore ni esaki etau kon.

⁵Kiwaak eboyor kon nia Ekapolon Akuj, kigienokin ngesi, kingarakini ngesi iyong.

⁶Isimauni ngesi ateneanut kon loger a akicha ana apaaran.

⁷Totitinyer ani a Ekapolon Akuj, idarit nguna esubakini. Nyiimaranik kotere ngulu abarakis lorotin kech a ngikulepek kori ereto ngakiro naaronok!

⁸Nyiiliworosi lu ingoaka kori lu inyunyurasi, kainyo itorunete ngichan neni.

⁹Lu igienosi Ekapolon Akuj, elomete nakwap. Nakaneni itwarakinio luaronok.

¹⁰Engopiarete luaronok atipei, tasak iyong kesi nakaneni nyianyuni.

¹¹ Eliwor akwap aka ngulu itiditeuna, talakaros alobarit a akwap ibooyete akaalimon.

¹²Erekini itwaan niaronon ngakiro naaronok, tosubea itwaan niajokon, sodi kiman ngesi.

¹³Ekianar Ekapolon Akuj luaronok, kainyo eyeni atamar anang esal kech.

¹⁴Eutunete luaronok ngilengea kech tokudokis ngakawa kech, esakete akiar lukebootok ka lu emam ibore, ka akingol lu esubete naajokak.

¹⁵Ebongokinete ngilengea ngulu kesi kichuma sodi tobilibilaarae ngakawa kech.

¹⁶Ejok ibore nidiochichi etingit itwaan niajokon, akidwang ebari lokaalan a itwaan aniaronon.

¹⁷Ielari Akuj agogongu aluaronok sodi kitogogong luajokak.

¹⁸Iyoki Akuj eboyor a ngitunga aluajokak. Irumete kesi akwap jik.

¹⁹Nyeboliare kesi na eponeta ngirwa luaronok, eriamunito kesi akimuj nakaalan ngirwa lua eron a akoro.

²⁰Etoakete luaronok, engopiarete ngimoe a Ekapolon Akuj loger a ngatur ana a achokor. Engopiarete loger a apuru.

²¹Eari itwaan niaronon amicha nyeetach. Nakaneni epatana ni etenoono iposi ngiboro.

²²Eliwor akwap aka ngulu epiarit Ekapolon Akuj. Nakaneni lu elam ngesi, ikisario anakwap.

²³Ekapolon Akuj erikit itwaan ani itorit. Iyoki ngesi lu ejoikinito ngesi.

²⁴Tani kedakarosi, nyidongete eperete alokwap, kainyo itonyouni Ekapolon Akuj kesi.

²⁵Asorokona kolong, amojong tokona. Nakaneni nyingolikina ayong Ekapolon Akuj eisikini itwaan niajokon, kori nyingolikina ngide a itwaan aniajokon ilipanarosi akimuj.

²⁶Iposi ngesi jiik pas nabo iposi ngamichae lotunga luche, sodi topiarae ngide keng.

²⁷Toisik naaronok, tosub naajokak, toyareta ngalesea kon anakwap jiik.

²⁸Emina Ekapolon Akuj nguna etenooko, nyeisikini ngesi ngulu emunosi ngesi. Iyoki ngesi ngulu etenooko jik. Nakaneni itwarakinio ngalesea aluaronok.

²⁹Eliwor akwap aka ngulu etenooko, toloma neni jik.

³⁰Iruoro itwaan ni etenoono ngakiro a aosou. Ngakiro na eriyan itorunito nangajep keng.

³¹Irichakinit ngesi etal a Akuj alotau keng, nyecheretiar ngesi.

³²Iseme itwaan niaronon itwaan niajokon, sodi tasak erot lo earea.

³³Nyimiekinea Akuj ngesi emoit keng, kori nyimiekini irirao na erikunere nitubet ngakiro.

³⁴Kigienokin Ekapolon Akuj, kirichak ngakiro keng. Kidodikini Ekapolon Akuj iyong arimatoi kiinak akwap, kingolik iyong luaronok emunyario.

³⁵Ayei kolong itwaan nikewogan tomoitana. Aoyaunit ngesi alotunga kadaang loger a ngichekereng a Lebanon.

³⁶Ani bo ekisidi etoruni[9] neni, atoriam emam. Atasak ngesi, katongopik.

³⁷Toripiripaa itwaan niajokon ni etenoono, eyakasi itwaan nikaalimon ngalesea.

³⁸Nakaneni emunyario ngikasechak, kikisarae ngalesea kech anakwap.

³⁹Eyuuni Ekapolon Akuj ngulu etenooko. Ikoni ngesi ataaba anikech na eponeta ngichan.

⁴⁰Ingarakini Ekapolon Akuj kesi toyuu. Eyuuni kesi ani eyakasi luaronok, kainyo amatarosi nikeng ani esaketa ayuuno.