Read turkana Ngieosio 38 Bible Online

Ngieosio 38 - turkana bible

Ngieosio 38

¹(Eeos a Daudi lo erai akigoro.) Ekapolon Akuj, nyikikilak kare ingoit! Nyikirira kinyunyurikina.

²Kigum iyong ayong a ngimalea kon. Kawan ayong akan kon.

³Emam akiyar eyei nakwaan kang, kainyo kingoikinit iyong ayong. Edeakasi ngakoyo kang kainyo kasechakinit ayong iyong.

⁴Kaburichaarito ayong ngasechesea kang, kenuito loger a eegos alo epot noi.

⁵Abos ngajemei kang tul, iwarete kotere abangaanut a akisech kang.

⁶Akudokina ayong, abilakina echana. Egoro ayong apaaran juui.

⁷Etirirau elekes akwaan kang. Emam akwaan ni nyakariebi ayong.

⁸Kaburu ayong adaidaun. Ariaba ayong akunua kotere nikaapilan.

⁹Ekapolon, iyeni iyong ibore nikemuit ayong. Ipupi iyong akigoro kang daang.

¹⁰Idongae etau kang, alilimiyo akwaan. Emuchakis tani ngakonyen kang, aribokis.

¹¹Nyeapuunete ngipaalon kang ka ngikidunyet diyete, kotere ngajemei kang. Achadarosi tani ngitunga lu kiyanar ayong.

¹²Kalokito ayong esakete akiar. Ngulu kagatakinito ayong naaronok kanyoikinito akiar. Etukosi kesi akiar ayong apaaran juui towar.

¹³Ekoni ayong itwaan nikinim nyapupi ngakiro. Ekoni ayong itwaan ni echakina chek, nyiruorikini.

¹⁴Ee robo, ekok ayong itwaan nikinim, ni nyetachuni ngakiro.

¹⁵Nakaneni kegieno ayong iyong Ekapolon Akuj. Iirari iyong ngakiro kang, Ekapolon Akuj na irai Akuj kang.

¹⁶Wara ngimoe kang nyakakianatar ayong, kotere ngichan kang. Nyiiwogatar kesi eger lo adakaror ayong.

¹⁷Edikino ayong adakar. Erubakinit nikaapilan anikang jiik.

¹⁸Alimorit ayong aronis kang. Egoro ayong atamar katorimakin kotere akisech kang.

¹⁹Eraakasi ngimoe kang ngitunga a ngikilinga, emam edeke edeakasi. Elalak lu karemokino ayong pas.

²⁰Ngulu kalunyanakinete ayong naaronok kotere naajokak asubi ayong, ketepegete ayong ani asubea na iyookino.

²¹Ekapolon Akuj, nyikichaka ayong. Nyiichadar kare anikang, Akuj kang.

²²Kingarakinae ayong atipei, Ekapolon lo irai Ekayuunan kang!