Read turkana Ngieosio 39 Bible Online

Ngieosio 39 - turkana bible

Ngieosio 39

¹(Eeos a Daudi) Alimuni ayong atama, “Erichakini ayong akiyar kang, nyaalakak angajep kang ketosechi ayong kotere ngakiro na alimuni. Elilingi ayong chek na engolikinea luaronok eyakasi diyete kang.”

²Elilingi ayong chek, emam akiroit alimu. Tani ikoni neni, apot ngichan kang toroketa noi.

³Apot ngichan katobelasi ayong. Ani alomari akitam, echanakin noi. Abu ayong engis atama,

⁴“Ekapolon Akuj, tolimokinae esal kang, ka etiae a ngirwa kang ta eger lo epiraketa ngirwa kang!”

⁵Itikidiokoon iyong ngirwa lu ayarea ayong! Nyerai akiyar kang ibore alongaren kon. Iteni dir, ikoni itwaan daang ekuwam pas,

⁶etoror loger a etorube. Erai ibore daang ni iricha ngesi akisub ika pas. Ebaruni ngesi ngibaren, nyeeyen atamar eliworosi moi ngika ngae.

⁷Ekapolon, nyo tokona egienokin ayong? Iyong kegienokin ayong!

⁸Toyuunae ayong anasechesea kang kadaang. Nyiichamu ngikabangabangae kakianatar ayong.

⁹Elilingi ayong chek nyalimuni akiroit, kainyo iyong kolong isubi nguna.

¹⁰Nyikirira nabo! Akot ayong akitu ani kibungaa iyong.

¹¹Irirae iyong ngasechesea a itwaan kikilanak, kinyasu ibore ni emina ngesi, loger lo inyasuneta ngakimam ngiboro. Iteni dir, ikoni itwaan daang akianget.

¹²“Ekapolon Akuj, kiira akilip kang ka akigoro kang. Kingarakinae ayong na ekalounio. Kainyo arai ayong epeyonon lo epori. Arai ekaloton, loger kata apaakang.

¹³Kimiekinae kare atalakar, eringa nyetoana, atongopia jik.”