Read turkana Ngieosio 40 Bible Online

Ngieosio 40 - turkana bible

Ngieosio 40

¹(Eeos a Daudi) Edarit ayong akingarakino a Ekapolon Akuj atitinyikinit. Abu ngesi katacham ayong kiira akigoro kang.

²Abu ngesi keriu ayong anakipany anaaronon. Keriu anasinyonoit anaikum. Kedokok ngesi ayong niajokon nataaba, atowo etiirakin.

³Ketatami ngesi ayong eeos lokitetet, eeos lokipuruunet Akuj yok. Ingolikinete lukaalak toema, sodi kigienokinos Ekapolon Akuj.

⁴Epiaritae itwaan ni igienokin Ekapolon Akuj. Nyereiar itwaan ngini lotunga lukenisak, lu ibatara ani ilipitotor ngakujo a alioko.

⁵Kisubea iyong sua ngakiro nakaalak, Ekapolon Akuj, na irai Akuj kosi. Emam iche ni ikwaan ka iyong! Elalak ngakiro nakatalarak irekinit iyong kotere sua. Emam kona emaruni ayong kesi daang. Elalak noi emam kona imarun!

⁶Nyisaki iyong ngakipeyos ka ngadekon. Nyisaki iyong ngakipeyos na inomio ka ngakipeyos na elemarete akisech. Pearai kiinak iyong ayong ngaki na apupio ngakiro kon.

⁷Abu ayong atama, “Ayong lo. Ngakiro nakisuruori iyong ayong, eyakasi nakitab na a Etal.

⁸ Amina ayong akisub nguna isaki iyong, Akuj kang! Akiroit nakitatami iyong ayong, erichakinit alotau kang.”

⁹Alimo ayong ngakiro naajokak a ayuuno, alongaren asepich a ngitunga. Ee Ekapolon Akuj, iyeni iyong atamar nyililinga ayong tani wadiochichi.

¹⁰Ngakiro nakiyuunea iyong ayong nugu, nyiwaa ayong alotau kang. Eruoro ayong jiik ngakiro a ajokis kon ka eger lo kingarakinitor iyong ayong. Nyebunakina ayong akituk kang alotunga alukaalak kotere amina kon na nyedaun ka ajokis.

¹¹Ekapolon Akuj, nyikimik akisienut kon! Amina kon ka ajokis, kesiboikinete ayong akaalimon.

¹²Keriamito ayong ngichan lukokaalak. Kalalakis ayong ngaronisea kang, emam kona imarun! Kesibuusikis ayong ngasechesea kang, emam tani kona engolikini akwap. Elalak kesi noi idwangito ngitim a akou kang, ketililimiyosi.

¹³Ekapolon Akuj, toyuunae kare ayong! Kingarakinae kare atipei, Ekapolon Akuj!

¹⁴Kimiekisi lu esakete akiar ayong kiruma ngileech ka ngibiler! Kimiekisi lu elakara ani ayakar ayong lochan, tobuarae akamaluwot, tokienare!

¹⁵Kimiekisi ngulu kakianatar ayong kiruma ngileech ani edwangere!

¹⁶Ani ngulu daang kisakete iyong, talakaros ka akimaritetere. Kimiekisi ngulu daang eminasi ayuuno kon, tolimuunut jiik ebalasi, “Epol Noi Ekapolon Akuj!”

¹⁷Apalag ayong, emam kona engarakin, nakaneni iyong Ekapolon, eringa kitamunit ayong. Iyong irai ekayuunan kang lo kingarakinit ayong. Bua kare atipei Akuj kang!