Read turkana Ngieosio 42 Bible Online

Ngieosio 42 - turkana bible

Ngieosio 42

¹(Eeos a talokookeng a Kora) Ee Akuj kang! Keitanit ayong iyong noi loger lo imuitotor agete ngakipi nakaalimok a angolol.

²Kanyamit ayong akure a Akuj. Ee robo, akure a Akuj ana eyari. Anangi ayong nikeng ori ataanyunga ereet keng?

³Egoro ayong akwaar ka apaaran. Ngakiyo aliworosi akimuj kang. Kengisito ayong ngimoe kang jiik ebalasi, “Nyaani Akuj kon?”

⁴Ealolongi noi na etamarea eger lokolong kimoreanakinor ka asepich a ngitunga engarenik arikit kai a Akuj. Alakara aeo abuakinit Akuj alakara kirukit ka asepich a ngitunga alosukukuu.

⁵Nyo ialolongio iyong kona, etau kang? Nyo iriabar iyong kona? Kigienokin Akuj, epuruuni ayong ngesi nabo, Akuj na erai akengarakinan ka akayuunan kang.

⁶Kesiasi ayong ngichan. Kotere ngakiro nguna, ketam ayong iyong Akuj, anakwap a Yorudan ka Erimon ta ngimoru a Misari.

⁷Kainu ngesi ayong ngitoroi lu kariebete etau, kabukokini ayong ngakipi a ngitoroi ka na a ngakalel.

⁸Naparan ketaanyuni Ekapolon Akuj amina keng na nyedaun. Ani nakwaare, aeonokini ayong ngesi eeos lo epuruunitor, elipit ngesi nakainakinit akiyar.

⁹Alimokinit Akuj ataaba kang abala, “Abe kimuriak bo iyong ayong, nyaai? Nyo arubakinitor ayong ealolongi, ani kechiakiaritotor ngimoe kang?”

¹⁰Kabelasi ayong ngiyeny kech, kengitanarete jiik ebalasi, “Aliwae eyei Akuj kon?”

¹¹Nyo ialolongio iyong kona, etau kang? Nyo iriabar iyong kona? Kigienokin Akuj, epuruuni ayong ngesi nabo Akuj na erai akengarakinan ka akayuunan kang.