Read turkana Ngieosio 44 Bible Online

Ngieosio 44 - turkana bible

Ngieosio 44

¹(Eeos a talokookeng a Kora) Akuj, kiira sua a ngaki kosi. Kisisakis sua taapaakosi, ngakiro na kolong isubea iyong kesi, kolong kanuan.

²Iyong alope itwarakini ngibukui luche, kitolom iyong ngitunga kon ni kolong ilomit iyong. Ibu iyong kirira ngibukui luche, talakak ngitunga kon.

³Nyelemara ngitunga kon akwap ngina kotere ajwonu kech. Kori nyidwanga kesi kotere ngikilinga kech. Pearai edwangete a agogongu ka ngikilinga kon, ani irukitotor iyong ka kesi kidodiu neni atamar imina iyong kesi.

⁴Iyong irai Ekapolon Akuj, Akuj kang. Itiliwo iyong ngalesea a Yakobo na idwangete.

⁵Kidwang sua ngimoe kosi a ngikilinga kon. Ee robo, epudata a ngikilinga kon.

⁶Nyegieno ayong akau kang, kori nyakayuuni ayong ekileng kang.

⁷Kiyuu iyong sua alomoe kosi, kisibiler lu kiremokino sua.

⁸Kipuruuni sua iyong ngirwa daang atobuanakisi iyong alakara jik.

⁹Nakaneni kiisik iyong sua kikianare. Nyeringa irukito ka ngasigerea kosi.

¹⁰Kisupunga iyong sua alomoe kosi. Tangatasi kesi ngibaren kosi.

¹¹Kimiek iyong sua kingolio loger a ngamesekin. Kipetak iyong sua lobukui.

¹²Igiela iyong itwaan kon a ngaropiyae anadikidio, tosub eraakasi kesi ngipasiek.[11]

¹³Engolikis ngikidunyet kosi nakisubea iyong sua. Alomasi kesi akimeny sua kikianatar.

¹⁴Kimiek iyong sua kimenyarete ngibukui luche. Kinyaiyonorete kesi sua kimenyarito.

¹⁵Kerumito ayong ngileech ngirwa daang. Keneineasi ayong ngileech,

¹⁶a ngakiro a ngiyeny ka ngimeny a ngimoe kang ka lu karemokino ayong.

¹⁷Asubakinosi nguna daang anikosi, tarai bo eringa sua nyimuriakina ngakiro kon. Eringa tani nyesecha achamunet na kolong kichamakin ka iyong.

¹⁸Nyesecha sua etal kon kori nyewoliyoro sua alorot kon.

¹⁹Tani ikoni neni kimiek iyong sua kilari alokiding ngitieng a moding. Kimiek iyong sua anaribu anakirion chuch.

²⁰Arai kimuriak sua alimit ekiro a Akuj kosi, kori arai ebakisi akuj nagela ngakan,

²¹kiyenit iyong nguna daang kainyo iyeni iyong ngakiro namunonoe na eyakasi lotai a ngitunga.

²² Nakaneni kilosikinitoe sua akiar jiik, kotere iyong. Kikok sua ngamesekin na engolio.

²³Tokienyu kare Ekapolon, nyo ijotoo iyong? Tonyou kare nyikiisik sua jik.

²⁴Nyo kidukakinitor iyong sua? Wara nyikimuriakis ngichan kosi ka ariaba!

²⁵Kidakakin sua nalup. Kikuruwo sua anyoun anapua.

²⁶Tonyou, bua kingarakinae! Toyuunae kotere amina kon na nyedaun!