Read turkana Ngieosio 48 Bible Online

Ngieosio 48 - turkana bible

Ngieosio 48

¹(Eeos a talokookeng a Kora) Epolot Ekapolon Akuj, ejoikinit ipuruunitoe noi, alore a Akuj yok, ka kidiama emukura keng.

² Sion lo erai emoru a Akuj, ewoi noi nabo ibus. Ere a ekapolon aloapolon erai alakara a akwap.

³Edodiu Akuj atamar ngesi emechio alotooma awas nakaagongon a ere.

⁴Achunakinosi ngikapolok wapei toremo emoru a Sion.

⁵Nakaneni ani eanyungarete ere a Sion, kuumwokis. Tobul kesi kipungaros.

⁶Apot kesi tobul toriabakinos loger a aberu ana esaki akidoun.

⁷Kikokis kesi ngatubwae na ibapabapaate ngitoroi a ekuwam aloationon.

⁸Kiira sua daang na asubi Akuj, nabo kianyunga sua ngikulepek, alore a Akuj yok, ana erai Akuj Namerikanyer. Itee Akuj ere ngolo toliwor ibooyi akaalimon jik.

⁹Ee robo, Akuj, kitamanari sua ngakiro a amina kon ana nyedaun, alotooma akai kon.

¹⁰Kipuruunitoe iyong awadaang. Epetakina ekipur kon akwap wadaang. Ipolokinit iyong itiriyanit ngakiro.

¹¹Kimiekisi ngitunga a Sion talakaros! Kimiekisi ngitunga a ere a Yuda talakaros! Ani itubio iyong ngakiro na iyookino.

¹²Ngitunga a Akuj, kapesi kirimo Sion. Kapesi kimarutu ngipemin keng.

¹³Kingolikisi ngawasea ka akisemere ngateak keng nakaagongok. Sodi kisisakis ngalesea na isidiuno ibalasi,

¹⁴“Erai naga Akuj, na erai Akuj yok jik! Eliwor akarikon yok jik!”