Read turkana Ngieosio 49 Bible Online

Ngieosio 49 - turkana bible

Ngieosio 49

¹(Eeos a talokookeng a Kora) Esi ngitunga daang, topupokisi akiroit naga! Todetasi ngaki esi daang lu ilomito nakwap.

²Esi lu kiyenikinitae ka lu nyikiyenikinitae, lukabarak ka lukebootok aapei.

³Iruoro akituk kang aosou. Etamanari ayong ngakiro a achwaanut.

⁴Adetari ayong akit atopupok ngakamatak, ani erumor esisau eger kech aramit agita.

⁵Nyaemi ayong na ayakar lochan, esaa lo keriameta ngimoe,

⁶kori ngitunga luaronok igienosi ebari kech ka akiwoga ani ebaritotor noi.

⁷Emam itwaan ibusi akiyar keng a ilope. Nyepedori ngesi ainakin Akuj ibore ni egielere akiyar keng,

⁸kainyo epol ibore ni ibusere akiyar a itwaan. Emam ibore ni elemuni ngesi ni itemokin,

⁹kimiekinere ngesi erubakinit eyari jik, nyeelomarea naliel.

¹⁰Eyenio daang atamar etoakete tani ngikoosok, ka ngikabangabangae ta lu iwaarit dang. Imiekinete daang ebari kech kiruma ngitunga luche.

¹¹Nalielin ibooyoto kesi nakajik. Ibooyete kesi kaneni jiik, tani kolong sek keyakasi ngalup na araakasi ngakech.

¹²Nyerubi itwaan anajakaanut keng. Etoani loger a etiengit a moding.

¹³Ngakiro nguna eanyunete lu igienosi abangaanut. Nguna eanyunete lu igienosi ebari kech.

¹⁴Idirete kesi lokatoak loger a ngamesekin. Akitu eliwor ekeyokon kech. Iengunete lu etenooko ingolikinete luaronok, ebosete ngawat kech analielin, echadara anakais ana kolong kech.

¹⁵Nakaneni kayuuni ayong Akuj, anagogongu a akitu. Kainyo ketepeyoni ngesi ayong.

¹⁶Nyiikadanakin na ingolikinea itwaan ebari, kori iatakin ebari keng talalaar noi.

¹⁷Emam ibore elemari ngesi na etoanea. Nyirukorete ebari keng ka ngesi naliel.

¹⁸Tani kenyakunit itwaan talakar ngirwa lu eyarea. Tani kipuruun ani ibooyo eboyor ajokon,

¹⁹elosi ni eyakasi taapaakeng alokatoak, ni nyeanyungarea akicha nabo jik.

²⁰Nyerubi itwaan anajakaanut keng. Etoani ngesi loger a etiengit a moding.