Read turkana Ngieosio 5 Bible Online

Ngieosio 5 - turkana bible

Ngieosio 5

¹(Eeos a Daudi) Ee Ekapolon Akuj, topupok ngakiro kang. Kiira akunua kang.

²Kiira akigoro kang, Akuj, Ekapolon kang. Kainyo iyong ngesi kelipit.

³Ipupi iyong etoil kang nataparach. Ani ipiripiruuni akolong katolemik iyong akipeyos[2] kang, ani erumor edaru nakilimokini iyong.

⁴Meere iyong Akuj na imina naaronok. Nyiboikin itwaan niaronon nikon.

⁵Kikadakinit iyong akingolikin ngitunga lukenisak. Iremokino iyong ngitunga luaronok daang.

⁶Imunyari iyong ngikaliokok daang nabo imenyarit lu emoitaka, tomodeaka.

⁷Nakaneni kotere amina kon na nyedaun, alomari ayong kai kon. Elipi ayong alokai ana italeunitoe atoriedik kedodikinit iyong arimatoi.

⁸Ekapolon Akuj, torikoe ayong a ateneanut kon! Kotere ngimoe kang, kitenik erot kon alongaren kang.

⁹ Emam ngakiro na iteni iruorosi ngimoe kang. Esakete kesi ayaun nginyas. Itoboboto kesi ngakituk, nakaneni erai ekiruor kech lokaaran.

¹⁰Akuj, tomunya kare kesi. Kimiek tomunyasi ngakiro na etukito. Kitwarak kesi kotere ngasechesea kech nakaalak, kainyo kingero kesi iyong.

¹¹Ani daang lu kimechete iyong, elakarosi. Eeosi jiik imariteteete. Kiyok lu eminasi ekiro kon. Toliworos elakara kotere iyong.

¹²Ekapolon Akuj, ipiari iyong ni iwapit ngakiro kon. Imukit iyong ngesi a amina kon loger a aupwal.