Read turkana Ngieosio 50 Bible Online

Ngieosio 50 - turkana bible

Ngieosio 50

¹(Eeos a Asap) Ekapolon Akuj Naationon iruoro. Enyarit akwap daang napei alo kide tanang too.

²Imaunit Akuj alo Sion alo erai ere lokebusean noi.

³Ebunit Akuj yok, nakaneni nyililingi! Ingareni akim nakariran ngesi, tokutunite ekuwam lokariran alowaitin keng kadaang.

⁴Enyarauni ngesi adis ka akwap taanyungasi eger lo etubio ngesi ngakiro a ngitunga keng.

⁵Elimuni tama, “Tochunakinae ngitunga kang lu kamunosi ayong, ngitunga lu kolong kichamakin ka ayong ani aareta akipeyos!”

⁶Elimorit adis ateneanut a Akuj. Akuj alope erai akatubon ngakiro.

⁷“Topupokisi ngitunga kang eruorik! Isirael, eruoro ayong ngakiro kon. Arai ayong Akuj, Akuj kon.

⁸Nyekekilakinit iyong kotere ngakipeyos kon. Eyakasi ngakipeyos kon na inomio ngaren kang jiik.

⁹Emam emong achamuni ayong ananok kon, kori nyachamuni tani ekoroe alosipaan kon,

¹⁰kainyo eraakasi ngitieng a moding daang ngikang, taraakas ngabunge a ngibaren lu eyakasi lomukur ngikang.

¹¹Eraakasi ngikieny a moding daang ngikang tani ngiborei lu eyarete lu eyakasi namanat eraakasi ngikang.

¹²“Tani kanyam ayong akoro nyakalimokini iyong, kainyo ngakwapea ka ibore daang ni eyei nakwapea erai ikang.

¹³Ikwa ibala iyong kori anyami ayong akiring a ngimongin, ka akimat ngaakot a ngaanei a?

¹⁴Kimiek abuakinit Akuj alakara toliwor akipeyos na ilemikinit iyong Akuj. Kiyook ngakiro na ichikakinit iyong Akuj Naationon.

¹⁵Tanyarae ayong na ianyunea ngichan. Kayuuni ayong iyong, sodi kipuruu iyong ayong.”

¹⁶Nakaneni elimokinit Akuj itwaan niaronon kona, “Nyo itatamar iyong ngitalio kang? Nyo iruoror iyong ngakiro a achamunet kang?

¹⁷Iwounit iyong asaki ayong arikin iyong. Ingerit iyong ngitalio kang.

¹⁸Naingolikinea iyong ekokolan, toelokinos. Irukito iyong ka ngikalomak.

¹⁹“Ijalak akituk kon akiruor naaronok jiik. Inait iyong akisud ngakiro.

²⁰Iruoror iyong ngitunga luche ngakiro naaronok. Iswamar iyong lokaatokon lo itorunito ka iyong akook apei.

²¹Isubi iyong ngakiro nguna daang eliling ayong chek. Esibit iyong ekoni ayong iyong a? Nakaneni kekilakinit tokona ayong iyong ketoron kotere akiroit naga.

²²“Kitamasi nugu esi lu nyikimisito ayong. Ani kemam kenyasuni ayong esi, tongop itwaan ni kiyuuni.

²³Itwaan ni kabuakinit ayong alakara, erai akipeyos keng, itwaan karima ayong ngini. Ani itwaan ni etenoono elote keng, ayuuni ayong ngesi.”