Read turkana Ngieosio 51 Bible Online

Ngieosio 51 - turkana bible

Ngieosio 51

¹(Eeos a Daudi, ekisidi a ekadwaran Nasan akisuruor ngesi ngakiro na elomit keng ka Basicheba.) Wae Akuj, kisienoi, kotere amina kon na nyedaun. Kotere ngisien kon luationok, kikisa akichwangakinit kang!

²Kilota aronis kang daang, kitosegae ayong anakisech kang!

³Ayeni ayong dir na echwanganakinit. Eyei akisech kang ngaren kang jiik.

⁴ Kasechak ayong iyong, iyong bon kasechakinit ayong, atosub nakironikinito iyong. Kotere nguna iyookinit iyong na itubio ngakiro kang. Eriyan ngakiro nakiriraa iyong ayong.

⁵Arai ayong itwaan aronon napei kolong kedounere. Kapotiuni kolong ayong itiokang arai ekasechan.

⁶Isaki iyong ateneanut ka ngakiro na iteni. Kileleb ngitamen kang aosou kon.

⁷Tolemarae akisech, etaleun. Kilotarae, atokwanger kea.

⁸Kilelebikinae alakara ka akiena. Alakar ayong nabo tani kolong kipudat iyong ayong.

⁹Tomulen, tojongo akitere ngasechesea kang, sodi kikisa aronis kang daang.

¹⁰Ee Akuj, tosubakinae etau lo eseg. Kiwaak tooma kang etau lokitetet totenoono.

¹¹Nyikitwarak alongaren kon. Nyiilema etau kon anikang.

¹²Nakinae ayong nabo alakara na itorunit nayuuno kon. Topwatakinae etau lo ewapea ngakiro kon.

¹³Ani ikokini neni, etatam ayong lu ichwanganakinete ngitalio kon, tobongut ngikasechak nikon.

¹⁴Ee Akuj, akayuunan kang, toyuunae ayong anakitu anakalosikinit, atolimo ayong a alakara ateneanut kon.

¹⁵Ee Ekapolon, tangaa kare akituk kang, eruorik ngakiro nakepuruunitor iyong.

¹⁶Nyikimuito iyong ngakipeyos. Arai atama epeye akipeyos na inomio, pekiminarit iyong.

¹⁷Akipeyos na echamit Akuj, ngesi etau lo eriangakina. Ee robo Akuj, etau lo eriangakin kitiditeun, nyimenyari iyong.

¹⁸Ee Akuj, tojoker ani a Sion kingarak. Tobongok akiduk ngawasea a Yerusalem.

¹⁹Ani kikok neni, ilakar iyong kotere ngakipeyos na a iteni, ka ngakipeyos kosi na inomio, ka na inomio nginerin daang. Ipeyeo ngimongin alokenoi kon.