Read turkana Ngieosio 57 Bible Online

Ngieosio 57 - turkana bible

Ngieosio 57

¹(Eeos a Daudi na epungaror ani a Saul anaburibur.) Kisienoi kare ayong, ee Akuj, kisienoi kare ayong. Kainyo nikon abuni akimech. Etorube a ngabeben kon ngesi amechi, tanang adaunet a ekuwam alo a nginyas.

²Egoronokini ayong Akuj na Epol Noi, na erai ngesi esubanakini daang na asaki ayong.

³Iirari ngesi ngakiro kang anadis katoyuu. Ngulu kechiakiarito ayong, isurumi ngesi ngileech. Kedodikini ayong Akuj amina na nyedaun ka ngisien keng.

⁴Keriamito ayong ngimoe kang loger a ngingatunyo alu enyamete ngitunga. Ikote ngikel kech ngakwaaras ka ngimalea a amod, ekwaka ngangajepa kech loger a ngilengea.

⁵Ee Akuj, kipuruunoe ekiro kon alokidiama adis. Topetakin ekipur lo kiyenikinitere iyong akwap wadaang.

⁶Alokakis ngimoe kang eloit lo kesurumeta. Esurur etau kang. Abokakinete kesi akipany lorot kang, nakaneni tadakakinos kesi ngikulepek neni.

⁷Etitiny etau kang, Akuj. Ee robo, etitiny etau kang! Aeokini ayong kepuruu iyong!

⁸Tonyou etau kang! Tonyou agita! Etonyouni ayong akolong!

⁹Ee Ekapolon kabuakini iyong alakara alotela. Kepuruuni iyong alobukui.

¹⁰Enangit amina kon na nyedaun nadis. Etapit amuno kon ngidowon.

¹¹Ee Akuj, kipuruunio iyong alokidiama adis. Topetakin akibuseanu kon akwap wadaang.