Read turkana Ngieosio 58 Bible Online

Ngieosio 58 - turkana bible

Ngieosio 58

¹(Eeos a Daudi) Esi ngikapolok! Itubeenete mono esi ngakiro kitiriyana a? Itubeenete esi ngakiro a ngitunga iyookino a?

²Mam jik! Naaronok make itamete esi akisub. Erukoonu isubete esi anakwap.

³Ibatarosi luaronok eringa epotiunitoe. Ichwangakinete napei idounere, eliokoko.

⁴Ileleba kesi akisierit na ikoni na a ngimunio. Egolol ngaki kech loger a akipom anakinim,

⁵ana nyiirari tani etoil a emuron alo emuroe a ngimunio, kori amuronot a ekekerian alokooson.

⁶Ee Akuj, topoko ngikel kech. Ee Ekapolon Akuj, todoto ngikel a ngingatunyo kangulu.

⁷Tongopiasi kesi loger a ngakipi ana ijujuyete ngalup, loger a nginyia alu ipudao tooniyosi.

⁸Kikok ekame lo ekeikin lodoot. Kikokis ikoku ni idounio etoanit nyeanyunga akolong.

⁹Etuborio kesi atipei eringa nyeyena. Etuborio loger a ngiikwa ka edoan. Ekutario kesi nikalonan eringa eyarete kotere anyunyura a Akuj.

¹⁰Elakarosi lu etenooko na ingolikineta luaronok irirao. Ipudaate kesi ngaakot aluaronok.

¹¹Elimunete ngitunga daang tamasi, “Ee rocha, ainakin lu etenooko ebachit. Eyei dir Akuj na etubi ngakiro a ngakwapea.”