Read turkana Ngieosio 60 Bible Online

Ngieosio 60 - turkana bible

Ngieosio 60

¹(Eeos a Daudi, lo erai itatamare, ngirwa lu ajioto Ngiaram lu aponito alo Naaraim ka Soba, tobongo Yoab sodi taar ngitunga 12,000 anadipo a Amakat.) Ee Akuj, kinger iyong sua kieala. Kingoikinit iyong sua. Wae, tobuarae kare sua nikon.[14]

²Itamaranik iyong akwap ipak, ipak iyong angaar. Toniken ni epakak, kainyo epeded.

³Itaanyu iyong ngitunga kon ngichan luaronok noi. Kitamat iyong sua emuna lo kisiteriteri.

⁴Itoosu iyong lukikerito iyong sodi tobucharotor kesi aloriras.

⁵Toyuunae sua a agogongu kon, kiik akilip kosi, sodi topuunotor ngitunga lu imina iyong.

⁶Eruorik Akuj ani italeuno[15] ebala, “Alosi tokona ayong emaritete atotiakatiaka akwap a Chekem. Atotiakanak ngitunga kang adipo a Sukos.

⁷Erai Gilead akang, tarai Manase akang. Erai Epiraim apukot kang tarai Yuda aburo a apolou kang.

⁸Etiliwori ayong Moab atubwa kang na ilotare, atowatak Edom ngamuk kang, kidodiu ibore ngini atamar apolokinit neni. Emaritetekini ani edwangea Ngipilisti.”

⁹Akuj, ngae karikori ayong lore lo edukitoe ngawasea nakaagongok? Ngae kariki ayong tanang Edom?

¹⁰Wae Akuj, kinger iyong sua jik a? Ikwa nyeringa iyong irukito ka ngasigerea kosi a?

¹¹Kingarakinae kare sua toyuunae alomoe. Kainyo erai akingarakino a itwaan pas.

¹²Kidwangi ngoni, erai ibakit Akuj alowae yok. Ngesi idwangi ngimoe yok.