Read turkana Ngieosio 62 Bible Online

Ngieosio 62 - turkana bible

Ngieosio 62

¹(Eeos a Daudi) Elilingi ayong chek edarit Akuj. Nikeng ayuunor.

²Ngesi bon erai ataaba kang ka ayuuno kang. Ngesi erai awas kang nakaagongon, emam ibore keloilookini ayong jik.

³Irubakinete esi ilosikinito itwaan ni ikoni awas na eukoro tanang ori?

⁴Isakete esi atiyaun ngesi ani eanyunitor arimatoi. Iminasi esi akiruoro alioko. Ipiarito a ngakituk, tarai ilamasi alotai.

⁵Elilingi ayong chek edarit Akuj. Egienokin ayong ngesi.

⁶Ngesi bon erai ataaba kang ka ayuuno. Ngesi erai awas kang nakaagongon, emam ibore keloilookini jik.

⁷Ayuuno kang ka arimatoi eyakasi nia Akuj. Ngesi erai ataaba kang nakaagongon. Ngesi amechit ayong.

⁸Esi ngitunga kang, kigienokinos Akuj ngirwa daang. Tolimokisi ngesi ngichan kus daang, kainyo ngesi kimechi ngoni.

⁹Ikote ngitunga daang akianget. Luapolok ka luuchik, eraakasi daang ngipasiek. Tani kitem anaratil, emam apotis eyei. Eok noi akidwang tani akianget.

¹⁰Wara nyiigienokin erukoonu. Wara nyiijapunea ebari lo edemio ngitunga. Tani kiatakin ebari kon, nyiigienokin.

¹¹Alimu Akuj alimunet apei. Eira ayong ngakiiraret ngaarei, atamar erai agogongu aka Akuj.

¹² Ekapolon, eira nabo ayong atamar erai amina kon na nyedaun. Kainyo iinanakini iyong itwaan daang ebachit itemem ka etich keng.