Read turkana Ngieosio 64 Bible Online

Ngieosio 64 - turkana bible

Ngieosio 64

¹(Eeos a Daudi) Akuj, ayei ayong lochan, topupok akilip kang! Toyuunae ayong, aemit ayong ngimoe kang.

²Kiwae ayong nyikianyun ka ngakiro namunonoe na etukito ngitunga luaronok, ka ekurikur a ngitunga aluaronok.

³Ipenete kesi ngangajepa kech loger a ngilengea. Eseletanarete ngakiro a amoitanut loger a ngimalea a amod.

⁴Eperunete kesi itwaan ni etenoono toguma. Ituumwokinete kesi toguma peemito.

⁵Epupokinosi kesi anakiro kech anaaronok. Echamakinosi kesi ni iweeta ngiloi kech. Itamete ebalasi, “Emam itwaan eanyungari.”

⁶Etukosi kesi naaronok tamasi, “Kirumo tokona nguna kirekinit! Ngae eanyuni ngakiro nakitukit ngoni?” Iweitae ngakiro namunonoe alotau a itwaan!

⁷Nakaneni egumi Akuj kesi a ngimalea a amod, sodi towan kesi atipei.

⁸Emunyari ngesi kesi kotere ngangajepa kech.[16] Itwaan daang ni eanyungari kesi, imungumungakini akou.

⁹Ani ikokini neni, tokera ngitunga daang Akuj. Elimorete na asubi Akuj, sodi kitama ngakiro na esubi ngesi.

¹⁰Elakarosi lu etenooko ani a Ekapolon Akuj, tomecha ngesi. Ipuruunete ngesi ngitunga luajokak.