Read turkana Ngieosio 66 Bible Online

Ngieosio 66 - turkana bible

Ngieosio 66

¹(Eeos) Ngitunga daang kipuro Akuj kimaritetekisi!

²Tolimosi ekipur a ekiro keng ieosi. Kituruutu ngesi, kipuro.

³Tolimok Akuj tama, “Kitalarete ngakiro na isubi iyong! Itiditeunosi ngimoe kon alongaren kon kotere agogongu na ipoloo iyong.

⁴Kilipito iyong ngitunga daang anakwap. Eeosi daang kipuruunito Akuj.”

⁵Bua taanyu na asubaki Akuj. Asub ngesi ngakiro na kitimete alotunga.

⁶ Elochi ngesi anam toliwor akwap nakoonon. Adokete ngitunga angolol a ngakejen. Talakaros kesi kaneni kotere ngakiro na asubi Akuj.

⁷Epolokinit ngesi nakajik kotere agogongu keng. Itee ngesi ngibukui. Wara lukechanak nyiwogakinosi.

⁸Esi ngibukui daang, kipuruutu Akuj yok. Tolimosi ekipur keng kiirarae.

⁹Kiturubak ngesi ngoni kiyari, nyechamakina ngesi ngoni kidakar.

¹⁰Ee Akuj, toroae sua, loger lo eroyere akwangat a akim.

¹¹Kimiek iyong sua kirum eloit. Kisiwok iyong sua eegos loapotion.

¹²Imiek iyong ngitunga kipudaate sua. Kitor sua nakim ka nakipi. Nakaneni kiyau tokona iyong sua nikaaloman.

¹³Ayauni ayong ngakipeyos na inomio kai kon. Kalemikini iyong ibore ni ekongit.

¹⁴Kalemikini ibore ni kolong kekongokini iyong, ngirwa lu aanyunitor ayong ngichan.

¹⁵Kainakini iyong ngakipeyos nakatumak, ngakipeyos a ngimesekin na inomio. Kepeyokini ngimongin ka ngikora.

¹⁶Esi daang lu ikerito Akuj, potu topupokisi, kesisak nakasubea ngesi ayong.

¹⁷Egoronokini ayong ngesi asaki kengarak. Atoeok ayong epuruunit ngesi.

¹⁸Arai edaite ayong akisech alotau kang, pekepupoki Ekapolon Akuj ngakiro kang.

¹⁹Nakaneni eira Akuj ngakiro kang. Apupoki ngesi akilip kang.

²⁰Epuruunit ayong Akuj, kainyo nyengero ngesi akilip kang, kori nyelemara ngesi amina keng na nyedaun anikang.