Read turkana Ngieosio 68 Bible Online

Ngieosio 68 - turkana bible

Ngieosio 68

¹(Eeos a Daudi) Kimiek Akuj tonyou, tobwangas ngimoe keng. Kimiek ngulu eremokino ngesi kipungaros alongaren keng.

²Eger lo ekutarea ekuwam apuru, ikote kesi neni ekutario. Eger lo ekeiarea aarwak imakinio nakim, ikote luaronok engopete alongaren Akuj neni!

³Nakaneni elakarosi lu etenooko na ebunio Akuj. Imariteteete, toeoto elakara.

⁴Toeokisi Akuj, kipuruutu ekiro keng. Tosubakisi erot keng kotere ngolo itorit lodowon.[18] Ekiro keng ngesi Ekapolon Akuj. Talakaros alongaren keng!

⁵Akuj na ibooyi italeuno, ngesi erai apakeng a ngikokiok, nabo ngesi echoikinit ngapuseru.

⁶Einakini ngesi lukebootok awi na elomete. Elachakini ngesi lu eenitae talakaros. Nakaneni ani lurukooi elomete nariet.

⁷Ee Akuj, na irikorea iyong ngitunga kon, na ilosio iyong anariet,

⁸abu akwap tamaranik, tobukun ngakipi a akiru, kotere ni abunio Akuj a Sinai.[19] Ee robo, kotere abunere kon, Akuj a Isirael.

⁹Ee Akuj, ibu iyong kitaram akiru nakaalan. Kisubus iyong akwap nasek abu tooniyo.

¹⁰ Apot ngitunga kon taanyut ngawiyei kaina. Kitan iyong lukebootok kotere ajokis kon.

¹¹Adunguni Ekapolon akiroit, tolimosi ngaberu nakaalak akiroit ngina.

¹²“Epungarosi ngikapolok ka ngasigerea kech!” Akoranakinosi ngaberu na ayakasi nawiyei ngiboro lu angatario.

¹³Ngitorubei a ngakurio lu abutakina akwangat, lu amalimali egolit anabeben kech. (Nyo kolong edongioto epewae kus nanokin a ngamesekin akolongit na a ejie?)

¹⁴Na ealarea Akuj Naationon ngikapolok alomoru a Salimon, abu eloch lo ipukit min neni.

¹⁵Emoru a Bachan, iwoi iyong noi, irai iyong emoru lo elalak ngaitae!

¹⁶Esi ngaitae! Nyo kiterekuyaritor esi emoru[20] lo kolong aseuni Akuj akilom? Elomi Ekapolon Akuj neni jik!

¹⁷Ebuni Ekapolon alo Sinai[21] tolot ni italeuno. Irukunete ka ajore nakaalan, a ngabunge anakaalak a ngaurukukui.

¹⁸ Edokari ngesi kidiama emoru lokooyen erikit ngirikon. Idiaununi ngadekon alotunga, tani alotunga alukechanak. Neni elomi Ekapolon Akuj na erai Akuj.

¹⁹Kipuroe Ekapolon! Kingarakinit ngesi ngoni ngiegosio yok jiik. Ngesi erai Akuj nakiyuunit ngoni.

²⁰Erai Akuj yok Akuj na eyuuni. Ekapolon Akuj na erai Ekapolon, kiyuuni ngoni anakitu.

²¹Ebwangabwangaari Akuj ngakies a ngimoe keng. Ee, ngakies alu erubakinito iwapito ngirotin kech luaronok.

²²Ebala Ekapolon abuuni ngimoe kon alo Bachan, abuuni kesi alokwap nganamea,

²³sodi kipuda iyong ngaakot kech, tomeyeto ngingokwo kus ngaakot kech.

²⁴Ee Akuj, iteete daang alotoru kon na iraakar iyong akedwangan. Alotoru a Akuj ana erai Ekapolon kang, elomari ni italeuno!

²⁵Ingarenete ngikaeok, totupito ngikaramak ngiburin. Eyakasi ngapesur na eramito ngatamburin kiding.

²⁶“Kipuruutu Akuj anasepich a ngitunga. Kipuruutu Ekapolon Akuj, esi ngalesea a Yakobo!”

²⁷Ingareniuni Benjamen echichi kech. Sodi totupuut ngikarikok a Yuda ka ajore kech. Kiwapuut ngikapolok a Sebulun ka Naputal.

²⁸Ee Akuj, idungok iyong agogongu kon, kidodiu ngikilinga lu isileereu iyong anikosi

²⁹alokai kon alo Yerusalem. Kiinunete ngikapolok ngadekon kech!

³⁰Kikilak Misiri, na ikoni etiengit lo eyei natiriwae, kikilak ngibukui lu ikote ngisipaan a ngimesekin ka ngimongin, tanang ngibukui ngulu kidodikinete iyong arimatoi tobuko echur. Kieala ngitunga lu eminasi ejie ngulu!

³¹Ebuni ekaweikinan alo Misiri. Ngitunga a Kuch,*g** einunete Akuj ngiboro kech.[22]

³²Toeokisi Akuj, ngapolosio a akwap. Toeokisi Ekapolon ipuruunito.

³³Ekapolon Akuj na itorit nadis, adis na kolong ngorot. Topupok ngesi iremari tobelak.

³⁴Tolimosi agogongu a Akuj. Eyei akibuseanu keng Isirael. Toyei agogongu keng nadis.

³⁵Erai Akuj naketubulon eyei nikeng ni italeuno. Erai ngesi Akuj a Isirael! Einanakini ngesi ngitunga keng ngikilinga ka apolou. Akuj kipuroe!