Read turkana Ngieosio 69 Bible Online

Ngieosio 69 - turkana bible

Ngieosio 69

¹(Eeos a Daudi) Ee Akuj, toyuunae ayong. Anangut ngakipi lodokole kang.

²Keliko ayong echoto lokaalan, emam nikaagongon awaar. Adakakin ayong nituluk a ngakipi, edikino ngitoroi kanyamete.

³ Kaburu ayong akigoro abala toyuunae, aono tani edokole kang. Etaapirik ngakonyen kang ani angolengoleto akingarakino kon.

⁴Elalak noi ngitunga lukaremokino ayong pas, idwangit ekimar kech tani ngitim a akou kang. Kesudioto ayong ngimoe kang ngakiro. Egogong kesi noi, esakete akiar ayong. Esakete atobuak kesi ngiboro lu kolong nyekokoeara ayong.

⁵Ee Akuj, iyeni iyong abangaanut kang. Nyidaitae ngasechesea kang anikon.

⁶Ekapolon lo irai Ekapolon Akuj, Nyiichamu lu kigienokino iyong irumete ngileech kotere ayong. Ee Akuj a Isirael, Nyiichamu lu kisakete iyong ekianare kotere ayong.

⁷Erai iyong ngesi keyenyere ayong, nabo iyong ngesi kerumitotor ayong ngileech.

⁸Ekok ayong epeyonon ani kata lokaatokang. Nyakayenete ayong ngitunga a awi kang.

⁹ Kanomit ayong eger lo aminar akai kon. Ekiyeny daang lo kiyenyere iyong, aliwor ekang.

¹⁰Na etiditeunor ayong atoron akimuj, keyenya ngitunga ayong.

¹¹Ani anapi ngikuniae egor, katokianatar kesi ayong.

¹²Kaswamatar kesi ayong alorotin. Ani ngulu ilewat, karamanakis ayong ngieosio.

¹³Ani eliwor ayong, kelipi iyong Ekapolon Akuj. Akuj kiikinae ayong esaa lo isakea iyong. Topupok kare ngakiro kang Akuj, kainyo etiono amina kon. Irai iyong ekayuunan lo emunoi.

¹⁴Kipudunoe ayong alochoto, nyekepok. Toyuunae ayong alomoe kang. Toyuunae anakipi anatuluk.

¹⁵Wara akaale nyekewoko. Wara nyeilokin nituluk kori nyaaloma naliel.

¹⁶Kiikinae ayong Ekapolon Akuj anajokis a amina kon ana nyedaun. Toreeun nikang kotere ngisien kon luationok!

¹⁷Nyikimulen ayong, ekasuban etich kon. Topupok ngakiro kang tokona, kainyo ayei ayong lochan.

¹⁸Taapuu nikang toyuunae. Talachakinae ayong alomoe kang.

¹⁹Iyeni iyong eger lo keyenyere ayong. Iyeni iyong ngileech kang ka eger lo nyakarimare. Iyeni iyong ngimoe kang daang.

²⁰Etililimiyosi ngiyeny etau kang, keloo ayong. Etamit ayong atamar kori kesieniyo, apot nyiikokis neni, atama kori kesililingio, nakaneni nyisililinga.

²¹ Kanyamit ayong akoro, kainakis kesi ekitoe lokaaran. Kanyamit akure, kainakis emuna loadwaran.

²²Kimiekisi ekimuje lokaalan toliwor eloit kech. Toliwor ngakipeyos kech ni edakakinosi kesi.

²³Kitumudukan ngakonyen kech nyiiteeto akwap! Kitiliwo ngigurae kech lu ichanete kesi.

²⁴Tonyunyurikin kesi, kimiek angoit kon kiruko ka kesi.

²⁵ Kidongo ngadakarin kech eraakasi ngawiyei ngorok. Tongop itwaan idongi eyari aloeaman kech.

²⁶Eboliatar kesi lu kolong irira iyong. Iatanakinete ngaporos alu kolong iwani iyong.

²⁷Kirira kesi kotere aronis kech daang. Nyiirimak kesi jik.

²⁸ Kimiek ngirora kech kikisarae anakitab alu eyarete. Nyiimarakin kesi ni igiritae ngitunga kon.

²⁹Nakaneni adeaka ayong nabo keloit. Ee Akuj, kikeunae ayong, kitoyuu!

³⁰Epuruuni ayong Akuj aeo. Alimori apolou keng ani abuakinea alakara.

³¹Italakari ibore ngini Ekapolon Akuj noi akidwang akipeyokin ngesi aite kori emong.

³²Eanyungarete lu ichiakiaritae nguna talakaros. Epwatunosi ngitai alu ilipito Akuj.

³³Epupi Akuj ngakiro a ngikebootok, nabo nyimenyarit ngesi ngitunga keng lu eenitae alojela.

³⁴Esi adis ka akwap, kipuruutu Akuj. Anam ka ibore daang ni eyei nanam, kipuruutu Akuj.

³⁵Eyuuni Akuj Yerusalem, sodi tobongok ere a Yuda akiduk. Elomete ngitunga keng neni kiruma akwap.

³⁶Irumete ngalesea a ngikasubak etich keng, ani ngulu eminasi ngesi, elomete neni.