Read turkana Ngieosio 7 Bible Online

Ngieosio 7 - turkana bible

Ngieosio 7

¹(Egoronokini Daudi Ekapolon Akuj kotere Kuch lo arai eka ekitela a Benjamen) Ekapolon Akuj na irai Akuj kang, Iyong kamechi ayong. Toyuunae ayong ani eyakasi daang lu kerisito.

²Ani pekikok iyong neni, epote kesi nikang loger a engatuny keriyasi nikalonan ni engopea itwaan kayuuni, katonyilinyilaasi kaina.

³Ekapolon Akuj, Akuj kang! Ani kasubit ayong apei a ngakiro kanu, ani kenyasunit ayong ngakan kang anaaronok,

⁴ani kasubitor lopae kang naaronok, kori karemit emoit kang pas,

⁵kimiek robo ngimoe kang keritasi ayong kerumut. Kimiek kesi katotubo ayong kataar, kemiekis aperi analup atoanit!

⁶Tonyou kare Ekapolon Akuj anangoit kon! Toweik anyunyura a ngimoe kang. Isakeene iyong jiik tosubae na eriyan.

⁷Tochunak ngitunga daang kiriama iyong, topolok alokidiama.

⁸Iyong itubi ngakiro a ngitunga kadaang. Totub ngakiro kang itemem ka ateneanut kang. Itemem ka eger lo nyasechitor ayong.

⁹ Totubo aronis a ngitunga aluaronok. Kitowo itwaan niajokon. Iyong Akuj na isubi na eteniyete, na itemi ngitai ka ngitamen.

¹⁰Akuj erai aupwal nakayuunit ayong. Eyuunit ngesi lu iwapito ngakiro keng.

¹¹Erai Akuj akatubon ngakiro na etenoono. Ngirwa daang irirae luaronok.

¹²Ani pekelunga ngitunga ngasechesea, ipenari Akuj ekileng keng. Irikini akau keng esaki akigum.

¹³Alemu ngesi ngiboro keng a ejie lukaarak, kipena ngimalea keng.

¹⁴Kingolik eger lo irokioto luaronok naaronok. Ileleba aronis nikech nabo euriuni engalas.

¹⁵Ebokakinito kesi luche ngapanya, nakaneni kesi ngikulepek echakakinosi neni.

¹⁶Ebongokini aronis kech kesi ngikulepek. Ewani kesi amoitanut kech a ngikulepek.

¹⁷Epuruuni ayong Ekapolon Akuj kotere ateneanut keng. Ekusi ayong Ekapolon Akuj na Epol Noi.