Read turkana Ngieosio 71 Bible Online

Ngieosio 71 - turkana bible

Ngieosio 71

¹Ekapolon Akuj, iyong kamechi ayong, nyikimiek kare kesurumio ngileech!

²Kotere ateneanut kon, kingarakinae ayong atopuun. Todeta akit kiira ngakiro kang, kitoyuu.

³Toliwor ataaba kang na amechi ayong, awas nakaagongon ayuunor ayong. Iyong ngesi kamechi ayong atoyuunor.

⁴Akuj kang, toyuunae kare ayong ani eyakasi ngitunga luaronok. Toyuunae anagogongu a ngitunga alukamoitanak, toroko.

⁵Kainyo iyong Ekapolon ngesi kegieno ayong. Kamuno ayong iyong napei kolong eringa asorokana.

⁶Kegienokin ayong iyong napei kolong kedounere. Kiyok iyong ayong napei kolong kedounere. Epuruuni ayong ekiro kon jiik.

⁷Aliwor ayong ekitetemes a ngikaalak, kainyo iyong lokaagongon amechi ayong.

⁸Ilelebun ekipur kon nakituk kang, ka aruonu kon apaaran juui.

⁹Nyikinger ayong ngirwa lu amojongea lugu. Nyikiisik ayong tokona ani apalagagea.

¹⁰Esakete ngimoe kang akiar ayong. Keruorotor, katukuotor.

¹¹Ebalasi, “Aisiki Akuj ngesi. Atasakasi erumutu, kainyo emam ikayuunan ngesi!”

¹²Wara nyiichadar kare anikang. Akuj kang, bua atipei kingarakinae.

¹³Kimiekisi lu kalosikinito ayong kidwangae ka akinyasuno. Kimiekisi lu esakete akiwan ayong kiruma ngileech tokienare.

¹⁴Nakaneni kegienokin ayong iyong jiik. Arubakini akipuruunit iyong.

¹⁵Alimori ayong ngakiro a ajokis kon. Eruoro apaaran juui ngakiro a ayuuno kon, tani kelalak ngakiro nguna akidwang na apedori ayong akiyen.

¹⁶Ekapolon lo irai Ekapolon Akuj, epuruuni ayong agogongu kon. Alimori ajokis kon, na erai akon bon.

¹⁷Ee Akuj, kitatam iyong ayong napei kolong adit. Eringa alimonori ngakiro kon nakatalarak.

¹⁸Nyikiisik kare Akuj tani kamojongit karai ekasukout lo a ngakorwo. Kimiekinae atolimok ngalesea na isidiuno, ngakiro kon nakatalarak, ka agogongu kon.

¹⁹Akuj, enangit ateneanut kon nadis. Isub iyong ngakiro naationok noi. Ngae iche ikwaan ka iyong?

²⁰Kiinu iyong ayong ngichan ka ariaba, nakaneni kitogogongi iyong ayong nabo. Alotooma akwap, kikeuni iyong ayong.

²¹Iatakini iyong arimatoi kang, kisililing nabo.

²²Kepuruuni ayong iyong a agita. Kotere ni iraakar iyong nakimunoi, Akuj kang. Arami agita kang katoeonok iyong, Akuj na italeuno a Isirael.

²³Emaritete ayong kaeonokini iyong. Aeokini a etau kang kadaang, kainyo kiyuu iyong ayong.

²⁴Alimori ayong ateneanut kon apaaran juui, kainyo lu esakete akiwan ayong, eruma ngileech akianare.