Read turkana Ngieosio 73 Bible Online

Ngieosio 73 - turkana bible

Ngieosio 73

¹(Eeos a Asap) Ejok dir Akuj ani a Ngisirael. Ejok ani eyakasi lu ikiuna ngitai.

²Nakaneni ani eliwor ayong, edikino adakar, echiesi ayong anidiochichi.

³Ikoni neni, keterekuyarete ayong lukenisak, ani engolikinea atamar isikokina luaronok.

⁴Emam ngichan eanyunete kesi. Elangir kesi ekilikilete ngawat.

⁵Nyeriabasi kesi loger a ngitunga aluche. Nyeanyunete kesi ngichan lu eanyuununete ngitunga luche.

⁶Kotere nguna, enapito kesi ekinis loger a akoromwae ana emosiring. Enapito ademanu loger a eworu.

⁷Elekete ngitai kech aronis. Ani ngitamen kech, naaronok etukosi akisub.

⁸Ekianatar kesi ngitunga luche kiruorotor naaronok. Inisasi kesi, toreta eger lo ichiakiareta ngitunga luche.

⁹Iyenyete kesi Akuj anadis, kiwoganakinete ngitunga anakwap.

¹⁰Iwapanakinete tani ngitunga a Akuj kesi, tonupa daang nacha elimunete kesi.

¹¹Alimunete kesi tamasi, “Ikokini Akuj eyeni ai? Eos sek Akuj na Epol Noi a?”

¹²Ikote ngitunga luaronok neni. Ejakaanito kesi jiik, kiatakis ebari kech.

¹³Ikwa tokona ibore en, ekiuna ayong pas a, ebooyi emam akisech asub a?

¹⁴Akuj, apaaran juui, kedes ayong. Ataparach daang, kaboliare ayong.

¹⁵Arai eruor nguna loger kech, pekeringa ayong kemarunitae atamar ekoni ngide kon.

¹⁶Abu ayong atasak eger a akiroit kana, nakaneni totioner akiroit ngina noi anikang,

¹⁷tanang alosi ayong atoloma kai kon. Sodi atoyen ngakiro na eanyunete luaronok.

¹⁸Iteni dir, iwaakinit iyong kesi nichurut ni edakakinotor kesi lochan!

¹⁹Inyasunio kesi atipei, tadaunos a epit aloaronon.

²⁰Ee Ekapolon Akuj, na inyounio iyong, tongopiasi kesi loger a akirujare ana engopi nataparach na ekienyunea itwaan.

²¹Naketilileta ayong ngakiro, katonoma etau,

²²abu ayong atabangaaner kewaa, ekok etiengit alongaren kon.

²³Tani ikoni neni, kirukit ayong ka iyong jiik, itingit akan kang na aloteten.

²⁴Kirikit iyong ayong kitatami, ani erumor kipeyou a arimatoi.

²⁵Ngae iche kengarakini ayong anadis pearai iyong? Ani kaliworo ayong ikon, nyo nabo iche asaki anakwap?

²⁶Tani kapalag ayong, iyong Akuj irai ngikilinga kang. Iyong bon kasakit jik.

²⁷Lu itiakasi ka iyong, emunyar dir. Imunyari iyong lu kimorete iyong.

²⁸Ani eliwor ayong, ejok ayakau diyete Akuj. Ekapolon lo erai Ekapolon Akuj ngesi amechi ayong. Alimori ngakiro daang nakasubea ngesi ayong.