Read turkana Ngieosio 74 Bible Online

Ngieosio 74 - turkana bible

Ngieosio 74

¹(Eeos a Asap) Akuj, nyo kichakarea iyong sua jik? Nyo epuruunitor angoit kon alotunga kon?

²Kitamu ngitunga kon lu kolong iseuni iyong a angorot toliworos ngikon. Irikuni kolong iyong kesi ani araakatar ngikedalak, toliworos ekitela kon a ilope. Kitamu emoru a Sion lo kolong ilomit iyong.

³Kipuda asakatan naga. Enyasut ngimoe yok ibore daang alokai a Akuj.

⁴Ewangakis kesi ani edwangeta emaritetekis alokai kon. Etowaa ngapenderae kech kaneni ani edwangeta.

⁵Ekwaanikin kesi ka ngikatubok ngakito lu etubete ngakito a ngaepe kech.

⁶Tobwangabwangaasi kesi ngakito a ngidorin a akai a Akuj, a ngirokonin ka ngakujuka kech.

⁷Kinyasut kesi akai kon kinoma. Kitiliwosi ni kilipitere iyong ni nyitaleuno.

⁸Asakete amunyar sua daang. Anakwap kadaang, kinoma kesi ni italeunitoe.

⁹Nyeringa sua kianyungari ngakitoodikinet! Emam nabo ekadwaran eringa eyei! Nyikiyeni atamar ikokinete ngakiro nege tanang ori!

¹⁰Akuj, kikianatar sua ngimoe tanang ori? Kiyenyete iyong jik a?

¹¹Nyo iwounitor iyong akingarakin sua? Nyo iwounitor iyong asubakin ibore idio?

¹²Akuj, irai iyong ekapolon kosi napei kolong anakisiakinet. Kiyuununi iyong sua ngayuunet nakaalak.

¹³ Ipaki iyong ngakipi a anam a agogongu kon anaationon. Tobwang ngakies a ngitieng aluliwoyek a anam.

¹⁴Ibwangi iyong ngakies a Ekipe alo anam alo enyaritae Lepiasan,[23] kisumuj akiring keng ngitieng[24] a ariet.

¹⁵Iteleleu iyong ngileleae ka ngayana, kitoon ngangololin naapolok.

¹⁶Erai apaaran akon, erai akwaar dang akon. Isubakini iyong akolong ka elap.

¹⁷Igerokini iyong ngikukuorin daang a akwap. Kiwaak akamu ka akiporo.

¹⁸Ee Ekapolon Akuj, toyen atamar kikianatar iyong ngimoe kon. Kiyenyi iyong ebukut lokabangaanan.

¹⁹Nyiisik ngitunga kon lu emam ikengarakinan, toisikinea ngimoe kech lukamoitanak. Wara ngitunga kon lu eboliare nyikimuriakis iyong.

²⁰Kitamu achamunet nakichamakin sua ka iyong. Ni eribokinit anakwap kadaang, ileleba ekurikur.

²¹Wara lu ichiakiaritae nyeanyut ngileech. Kimiek lukebootok ka lu ichanasi kipuruut iyong.

²²Akuj, tonyou kare tolim nakon! Toyen atamar kikianatar iyong ngitunga lukabangaanak apaaran juui.

²³Wara nyikimuriak echale a ngimoe kon, ka ekurikur lo echalatar lu kitepegete iyong.