Read turkana Ngieosio 77 Bible Online

Ngieosio 77 - turkana bible

Ngieosio 77

¹(Eeos a Asap) Ekaloikinit ayong Akuj eute. Ekaloikinit ayong eute, kiirarea ngesi ngakiro kang.

²Akolongit na a ngichan elipi ayong Ekapolon. Akwaar kiiya ebakinit ngesi ngakan elipit. Nakaneni anger etau kang akisililingo.

³Ani etamuni Akuj, atoriabakin. Ani etamari ngakiro keng, atolilimiyo.

⁴Nyeketubunakini ngesi ayong ngakonyen akwaar kiiya. Echanakin ayong noi emam tani kona eruorikini.

⁵Etami ayong ngakiro a ngirwa alu kolong ngorok. Etamunit ngikaru lu kolong kanuan.

⁶Etami ayong akwaar kiiya kiwala. Etamanari ayong engis kona,

⁷“Ekoe, kinger sua Ekapolon jik a? Ikwa nyeringa nabo kimina sua?

⁸Kengop amina keng na nyedaun a? Nyeringa ngesi iyookino akichikakinet keng a?

⁹Ekoe, kimuriak Akuj akisienut a? Ekoe, kipudo angoit keng apalaanut anikeng a?”

¹⁰Abu ayong atolim atama, “Ibore ni kawanit ayong noi, ngesi akiyen atamar nyeringa Akuj erai na Epol Noi!”

¹¹Etamuni ayong ngitichisio kon, Ekapolon Akuj. Etamuni ngakiro nakatalarak na kolong isubi iyong.

¹²Etamuni ayong daang na isub iyong. Etamanari ngitichisio kon luationok daang.

¹³Ee Akuj, italeuno erot kon. Emam akuj epol loger kon.

¹⁴Irai iyong Akuj na isubi ngakitoodikinet nakailiilok. Idodiuni iyong agogongu kon alobukui.

¹⁵Iyuu iyong ngitunga kon a agogongu kon. Ee robo, ngalesea a Yakobo ka Yosep.

¹⁶Akuj, nakianyungareta iyong ngakipi, apot toema. Ee robo, tamaranik nituluk a ngakipi.

¹⁷Tobukut ngidowon ngakipi. Togirok kidiama torikirikok. Kimileu wadaang.

¹⁸Tobelak Ekipe, Kinwaku akwangis a akimilea akwap. Tamaranik akwap torikirikok.

¹⁹Itori iyong kiding ngitoroi a anam. Totenik anam nituluk, nakaneni emam itwaan aanyunga ngakejen kon.

²⁰Irikit iyong ngitunga kon loger a ekeyokon, erai Musa ka Aron apolokinito.