Read turkana Ngieosio 78 Bible Online

Ngieosio 78 - turkana bible

Ngieosio 78

¹Ngitunga kang, topupokisi ngakitatamet kang. Todetasi ngaki kiirasi ngakiro kang.

² Eruorikini ayong ngakitadapet. Esisau ngamunonoe na kolong ngorok.

³Ngakiro na kolong kiirari ngoni atoyena. Ngakiro na kolong kilimokinete ngoni taapayok.

⁴Nyikimunoni alode yok. Kisisakini anaket na isidiuno ngakiro a apolou ka agogongu a Ekapolon Akuj, ka ngakiro nakatalarak asubi ngesi.

⁵Nak ngesi Ngisirael ngitalio. Todungok ngalesea a Yakobo ngakiro. Tolimok taapaayok atamar kitatama ngide kech ngitalio keng.

⁶Sodi toyenea anaket na isidiun, ani lu idounio ekisidi toyena, tolimokineta kesi dang ngide kech.

⁷Ani kikokis neni, igienokinosi Akuj, nyiimuriakis na asub ngesi, pearai toliwor iwapito ngitalio keng jiik.

⁸Nyiikokis kesi taapaakech lukechanak nyeepupete ngakiro. Araakasi kesi lu egienosi Akuj wadiochichi, towout amunokin ngesi a ngitai kech.

⁹Ngitunga a Epiraim lu atingito ngakawa ka ngimalea, tobongosi akamaluwot akolongit na ejie.

¹⁰Nyirichuna kesi achamunet a Akuj. Towout akiwap etal keng.

¹¹Kimuriakis kesi ngakiro na kolong asubi ngesi, ka ngakitoodikinet nakailiilok na engolikinete kesi esubi Akuj.

¹² Asubi Akuj ngakitoodikinet nakailiilok iteete taapaakech anaro a Soan anakwap a Misiri.

¹³Tapak ngesi ngakipi a anam kisitor kesi. Kitowo ngakipi loger a ngawasea.

¹⁴Torik kesi a edou naparan, ani akwaar kiiya torik a akim ana anoki.

¹⁵Tapak ngesi ngatabab anariet kitamat kesi ngakipi na aokuniyo anituluk.

¹⁶ Abeluni ngesi ngakipi anataaba, toleleut loger a angolol.

¹⁷Tani ikoni neni, apot kesi torubakis esechakinito Akuj. Tongero Akuj na Epol Noi anariet.

¹⁸ Kiyechakis kesi akining Akuj, ani asaketa Akuj nak kesi akimuj na emuit.

¹⁹Apot kesi kitopega Akuj ebalasi, “Ekoe, epedori Akuj ainakin ngoni akimuj anariet a?

²⁰Iteni dir arami ngesi ataaba, totulakanyuun ngakipi kilelebun ngingololin. Epedori dir ngesi akipotor akimuj a? Einakini ngesi ngitunga keng akiring a?”

²¹Tongo Ekapolon Akuj na eirarea ngakiro nguna, tonyunyurikin ngalesea a Yakobo. Tongoik ngesi Ngisirael noi,

²²kainyo peanupito ngesi, nabo nyigienokino kesi atamar kiyuuni Akuj.

²³Tani ikoni neni abu ngesi todungok ngidowon alokidiama, todungok ngidorin a adis atamar tangaaros.

²⁴ Nak kesi ngikinyam a adis ani etetepea manna tanyama.

²⁵Apot kesi tanyama akimuj a ngimalaikae, nak Akuj kesi akimuj a alalau.

²⁶Kitukut ngesi ekuwam lo a akide. Kotere agogongu keng, kilirak ekuwam lo alokuju.

²⁷Tachaku akiring nakaalan lotunga keng, ee robo, ngikieny lu etia asinyen na ekwaas a anam.

²⁸Todoto ngikieny ngulu kiding adakar kech, kiriama ngieman kech daang.

²⁹Apot ngitunga kirajakin kimwoko. Nak Akuj kesi ibore ni emuit.

³⁰Nakaneni ani eringa ekimue kech nyedauna, ani eringa akimuj eyei nakituk kech,

³¹abu Akuj tongoik kesi. Taar ngikiliok lua ngikilinga anikech, kibusok ngisorok lu ekileenikinit alo Isirael.

³²Tani ikoni neni, torubakis ngitunga esechanakinete Akuj. Tani na asubea ngesi ngakitoodikinet nakailiilok, towout kesi akinup.

³³Abu Akuj kitongopia ngirwa kech loger a akianget, ani akiyar kech, kiriamun ka naaronok.

³⁴Ani eari ngiche, toreeunos lupiyayek nikeng. Tolunga kesi akisech, kilipa Akuj lokojokon.

³⁵Kitamut kesi atamar Akuj erai ataaba kech, Akuj na Epol Noi ingarakini kesi.

³⁶Nakaneni araakasi ngakiro kech daang alioko. Emam na eruorosi kesi na araakasi iteni.

³⁷Peamunosi kesi ngesi a ngitai kech. Peerichakinito achamunet keng.

³⁸Nakaneni esienito Akuj ngitunga keng. Torimak kesi nyemunyara. Ngirwa ngikaalak kiratak angoit keng, kiapak anyunyura keng.

³⁹Kitamu ngesi atamar eraakasi kesi lu epedorete akitu, lu ikote ekuwam lo ipinupinuun topuripuriakin.

⁴⁰Ngirwa ngikaalak angereenete kesi Akuj anariet. Kisialolongo kesi ngesi anariet!

⁴¹Kiningeeneto kesi Akuj jiik. Kitongoa Akuj na italeuno a Isirael.

⁴²Kimuriak kesi agogongu keng naationon. Kimuriak tani akolongit na ayuunea Akuj kesi alomoe kech,

⁴³tosub ngitichisio lukationok alo Misiri, ka ngakitoodikinet nakailiilok anaro a Soan.

⁴⁴ Elochi ngakipi a ngangololin toliworos ngaakot. Tongopikis Ngimisiri ngakipi emaase.

⁴⁵Tomeu ngichuch nikech kichana, ka ngakidodoka na enyasunete akwap kech.

⁴⁶Tomeu ngesi ngikutelei tanyama ngalemet kech, kirikasi ngimases ngamanat kech.

⁴⁷Kinyasu ngimusabib a ngamoru a akiru, ani ngimeyana kech, kinyasu a eloch.

⁴⁸ Aari ngaatuk kech a ngamoru a akiru. Ani ngamesekin kech taar a akimilea.[27]

⁴⁹Abu ngesi kisialolong kesi noi, tobukok kesi anyunyura keng naaronon a ngichan, apote ngimalaikae luaronok nikech eyaunito akitu.

⁵⁰Abu ngesi nyiiratak angoit keng, kori nyiimiek kesi epuunosi. Taar kesi daang a edeke aloaronon.

⁵¹ Taar ngide lusapa lu ekingaren a Ngimisiri kadaang, lu araakasi ngikilinga a adwarun kech.

⁵²Kitowot ngesi ngitunga keng loger a ngamesekin, torik anariet loger a esipanit a ngibaren.

⁵³ Torik kesi niajokon, nyeema kesi. Toleleu anam tanyam ngimoe kech.

⁵⁴Kitowot kesi nakwap keng na italeuno, lomoru lu alemari ngesi a agogongu keng.

⁵⁵ Kitwarak ngesi ngibukui eloose Ngisirael ngaren. Totiakak Ngisirael akwap kech. Nak ngitunga keng ngawiyei kech.

⁵⁶Tani ikoni neni, apot kiningo Akuj na Epol Noi tongero. Towout akirichakin ngakiro keng.

⁵⁷Apot kesi tongero Akuj tosuba naaronok loger kata apaakech. Kibataros loger a emal alo erii.

⁵⁸Kitilileta kesi Akuj ani elipitotor ngakujo nagelayek. Kotere ngakujo kech nasubuna, apot kitongoa ngesi.

⁵⁹Tongo Akuj na engolikinea ngakiro nguna, tonger ngitunga keng jik.

⁶⁰ Tapalik ngesi ni eboyeeneo alo Chilo. Ni ebooyo ngesi alokiding ngitunga keng.

⁶¹Kimiek ngimoe elemarete asaduku a Achamunet, asaduku na erai emachar a agogongu ka aruonu keng.

⁶²Tongoik ngesi ngitunga keng kimiek ngimoe kech earete kesi.

⁶³Kirikarae ngisapa alojie, tongopa ngikiliok iusete ngapesur kech.

⁶⁴Totoaka ngimurok kech alojie, nakaneni nyigoro ngaberu kech tosutonokis.

⁶⁵Ani ekisidi tonyou Ekapolon esibit kejotoe sek. Ekoni ngesi ekile lokaagongon lo emerakina kotere emuna.

⁶⁶Etijikini ngimoe keng tobua akamaluwot. Kisurum kesi ngileech lukajik.

⁶⁷Tonger ngesi ngalesea a Yosep, towou aseun ekitela a Epiraim.

⁶⁸Abu ngesi toseu ekitela a Yuda ka emoru a Sion lo emina ngesi noi.

⁶⁹Todukok ngesi akai keng neni ikwaan ka akai keng na eyei nadis. Kitogogong ngesi jik loger a akwap.

⁷⁰Toseu ngesi Daudi, ekasuban etich keng. Toriku ngesi anachokor.

⁷¹Anyarae ngesi iyoki ngibaren keng, kitiliwo ngesi ekapolon a Isirael, kiyokio ngitunga a Akuj.

⁷² Alemuna Daudi lokojokon akiyok kesi, totwar echoikinit noi.