Read turkana Ngieosio 80 Bible Online

Ngieosio 80 - turkana bible

Ngieosio 80

¹(Eeos a Asap; nguna elimoritae) Todeta akit, Ekeyokon a Isirael. Iyong lo irikit ngalesea a Yosep loger a ngamesekin. Iyong lo ibooyi alokidiama ngiborei lua ngabeben.

²Kidodiun ani a ngitela a Epiraim, ka Benjamen, ta Manase. Kidodiu agogongu kon. Bua toyuunae sua!

³Akuj, kitojokae sua nabo, kisienoi sua atoyuunotor.

⁴Wae Ekapolon Akuj Namerikanyer, ingoikini iyong ngakilipasinei a ngitunga kon tanang ori?

⁵Akialolong itarau iyong akimuj kosi. Ngakiyo na eropiyete kitamasi iyong sua.

⁶Imiek iyong ngibukui lu kidunyar sua emoriate akwap kosi. Kiyenyete sua ngimoe kosi.

⁷Akuj Namerikanyer, kitojokae sua nabo, kisienoi sua, atoyuunotor.

⁸Iyauni kolong iyong emusabib alo Misiri. Kirita ngibukui lugelayek, sodi kitak emusabib nakwap kech.

⁹Ibu iyong tokurwo ni erupunea. Kilijakin ngaten keng nalup, kineineasi akwap wadaang.

¹⁰Kimuk etorube keng ngimukur. Kiniapar ngasepukan kech, alochekereng aluapolok.

¹¹Kikobaros ngasepukan keng tananga nanam a Mediterenian. Toliasi ngaten keng tananga lokwaas a angolol a Eupurate.

¹²Nyo kolong iyatarea iyong ngawasea na eriamito ekitoe ngolo? Aliwor tokona itwaan ni itoruni neni daang, ekokoi emusabib.

¹³Ipudaate ngiputiro, tadaka ngitieng a moding.

¹⁴Toreeun nikosi, Akuj Namerikanyer! Tokienyu anadis nikosi. Bua toyuu ngitunga kon.

¹⁵Kirichak emusabib lo kolong itakini iyong a akan kon. Emusabib loochi iturupuni iyong togogonger.

¹⁶Enoma ngimoe ekitoe ngolo, atubosi. Tonyunyurikin kesi tomunya.

¹⁷Toik iyong ngitunga lu iseuni iyong. Ebukut lo itogogongi iyong.

¹⁸Nyeringa nabo sua kibatar anikon. Kiteyarae sua, sodi epuruutu iyong.

¹⁹Ekapolon Akuj Namerikanyer, Kitojokae sua nabo, kisienoi sua, atoyuunotor.