Read turkana Ngieosio 86 Bible Online

Ngieosio 86 - turkana bible

Ngieosio 86

¹(Akilip a Daudi) Topupok kare ngakiro kang, Ekapolon Akuj. Todeta akit kainyo keboosit ayong apalag.

²Toyuunae ayong anakitu, kainyo anupit ayong ngakiro kon. Toyuunae ayong ekasuban etich kon lo kegieno iyong. Irai iyong Akuj kang.

³Ee Ekapolon, kisienoi ayong. Kegoronokini ayong iyong apaaran juui.

⁴Ekapolon Akuj, kitalakarae kare cha ayong lo arai ekasuban etich kon. Kainyo idirunito ngakilipasinei kang nikon.

⁵Ijok iyong Ekapolon nabo irimakini atipei. Elal amina kon na nyedaun ani eyakasi lu kinyarito iyong.

⁶Ekapolon Akuj, topupok akilipa kang. Kiira akigoro na asakea atamar kingarak.

⁷Kanyarae ayong iyong akolongit na a ngichan, kainyo iikini iyong ngakilipasinei kang.

⁸Ekapolon, emam akuj ikwaan ka iyong. Emam na epedori akisub na isubi iyong.

⁹ Ngibukui daang lu isubuni iyong, epote toriediko alongaren kon, Ekapolon. Ipuruunete kesi apolou kon.

¹⁰Igogong iyong noi tosubi ngakiro nakatalarak. Iyong bon irai Akuj.

¹¹Ekapolon Akuj, kitatamae ayong elote kon, sodi ewap ayong atomunok. Torik etau kang katoker iyong.

¹²Ekapolon lo irai Akuj kang kepuruuni iyong a etau kang kadaang. Alimori ayong apolou kon jik.

¹³Elal amina kon na nyedaun anikang. Kiyuu iyong ayong analiel.

¹⁴Ee, Akuj, kerikaut ayong ngitunga lukewogak. Ajore a ngitunga alukamoitanak, esaki akiar ayong. Ngitunga lu nyikimisito iyong.

¹⁵Nakaneni iyong Ekapolon, irai Akuj naajokon na ngisien. Irai iyong na nyingoyeene atipei, na elal amina na nyedaun ka iteni.

¹⁶Toreeun nikang kitorimak. Kitogogongoi ayong toyuunae, ani asubea ayong etich kon, loger lo kolong asubea itiokang.

¹⁷Ekapolon Akuj, kidodikinae ibore ni idodiunit ajokis kon, sodi kirumeta ngileech lukaremokino ayong, na ingolikineta atamar kingarak iyong ayong kisililing.