Read turkana Ngieosio 89 Bible Online

Ngieosio 89 - turkana bible

Ngieosio 89

¹(Eeos a Etan alo arai Esirait) Ee Ekapolon Akuj, aeo ayong jik amina kon na nyedaun. Alimori atamar irai iyong lo kimunoi jik.

²Ayeni atamar erubi amina kon na nyedaun jik. Erubit amuno kon jik loger a adis.

³Ilim iyong itama, “Kichamakin ayong ka eseuna kang, ekongok ekasuban etich kang Daudi abala,

⁴ ‘Etiliwori alesit kon jiik ekapolon. Etiliwori ayong apolou kon na eyei jiik.’ ”

⁵Ee Ekapolon Akuj, kimiek adis kikut ngakiro nakatalarak isubi iyong. Eeosi lu italeunitoe eger lo iraakar iyong lokimunoi.

⁶Ekoe, ngae eriyan ka Akuj anadis? Emam ni ikwaan ka iyong alosubuna alu adis!

⁷Kikeritae iyong anatuk alu italeuno. Daang lu kiriamito iyong, kirimasi iyong kikerito.

⁸Ee Ekapolon Akuj Namerikanyer, ngae egogong loger kon, Ekapolon Akuj. Iyong nakimunosi daang.

⁹Ipolokinit iyong akulare a anam. Ani ekuunete ngitoroi, kisililing iyong.

¹⁰Irami iyong etiengit loliwo lo enyaritae Raab taar. Idwangi iyong ngimoe kon a ngikilinga kon.

¹¹Erai adis akon, tarai akwap akon. Isubi iyong ngakwapea ka ngiboro daang lu eyakasi nakwapea.

¹²Isubuni iyong kwap ka kuju. Kieonokinete iyong ngimoru a Tabor ka Erimon elakara.

¹³Igogong iyong noi! Etioko ngikilinga kon!

¹⁴Erai apolou kon na itoweit ateneanut ka ngakiro na eriyan. Amina na nyedaun ka amuno etakani anakiro kadaang ana isubi iyong.

¹⁵Ee Ekapolon Akuj, epiaritae ngitunga lu eyenete akipuruun iyong a ngieosio. Ngitunga lu eloose anakicha a amina kon.

¹⁶Elakara kesi apaaran juui kotere iyong, kipuruunito iyong kotere ateneanut kon.

¹⁷Iyong irai ajakaanut ka ngikilinga kech. Kotere amina kon kisidwangi iyong sua.

¹⁸Kainyo erai aupwal kosi aka Ekapolon Akuj. Iyong Akuj na italeuno a Isirael ngesi kiinakini sua ekapolon kosi.

¹⁹Kolong a angorot, ilimokini iyong ngikasubak etich kon lu imuno, tolimok anakisingolikinet tama, “Engarak ayong ekajwon epei. Etiliwo ayong epei lo aseuni alotunga ekapolon.

²⁰ Aseu ayong Daudi, ekasuban etich kang, ewasak akimiet a etal.

²¹Irukete ngesi ka agogongu kang jik. Itogogongi ngesi agogongu kang a ilope.

²²Nyidwangete ngesi ngimoe, kori nyichiakiarete ngesi luaronok.

²³Epudaari ayong ngimoe keng. Amunyari daang lu eremokino ngesi.

²⁴Amuno kang ka amina na nyedaun irukete ka ngesi. Idwangi ngesi a ekiro kang.

²⁵Anyaari ayong apolou keng, napei alo Mediterenian tanang nangolol a Eupurate.

²⁶Kekaloikini ngesi ayong tama, ‘Irai iyong apakang ka Akuj kang. Irai iyong ataaba kang ka ekayuunan kang.’

²⁷ Etiliwori ayong ngesi euriuna kang lo ekingaren, ekapolon lo idwangit ngikapolok daang anakwap.

²⁸Erichakini ayong jiik amina kang na nyedaun anikeng. Eliwor achamunet kang ka ngesi akajik.

²⁹Erubi apolou keng jik loger a adis. Etiliwori ayong alesit keng jiik ekapolon.

³⁰“Nakaneni ani kesecha ngalesea keng etal kang, towout akiboi iwapito na adungunit ayong.

³¹Ani kichwangakis na echikakinit ayong, towout akiwap ngitalio kang.

³²Arami ayong kesi kotere ngasechesea kech. Erirae kesi kotere na ichwangakinito kesi.

³³Nakaneni nyaisikini ayong amina Daudi, kori nyapalikini akirichakin akichikakinet kang anikeng.

³⁴Nyechwangakini achamunet nakichamakin ka ngesi, kori nyelochi akiroit na echikakini.

³⁵“Ekong ayong akikongiet apei jik kotere akitaleuno kang. Iteni dir, nyengalae ayong Daudi.

³⁶Epete ngesi ngalesea jiik. Erupuni apolou keng loger a akolong.

³⁷Erupuni loger a elap alo erai ekaanyunan lo emunoi anadis.”

³⁸Nakaneni ingoik tokona iyong ekapolon kon loseuna. Imiek iyong ngesi inger.

³⁹Ichwangak iyong achamunet na ichamakinosi ka ekasuban etich kon sodi tachakak ekiraun keng lochoto.

⁴⁰Iuko iyong ngawasea a ere kon, sodi tobwangabwanga ngawasea keng.

⁴¹Ngitunga daang lu itoruunete neni ekokoyete ngiboro keng. Ekianatar ngesi ngikidunyet keng daang.

⁴²Itiliwo iyong ngimoe keng daang ngikedwangak. Imiek iyong ngimoe keng daang elakarosi.

⁴³Itingingi iyong ngiboro keng a ejie. Kimiek ngesi idwangio alojie.

⁴⁴Ilema iyong aburo na eraakar ngesi ekapolon,[28] kimasak ekicholong keng a apolou nalup.

⁴⁵Itikidieku iyong ngirwa a esorokane keng, toburuchia ngesi a ngileech.

⁴⁶Ekapolon Akuj, iduki iyong nakajik a? Enoki angoit kon loger a akim tanang ori?

⁴⁷Ekapolon Akuj, kingolik mono iyong eger lo eurianea eboyor a itwaan! Toyen atamar emam ibore kolong kisubakinitor iyong sua!

⁴⁸Ngae alotunga ibooyi nyetoana? Ngae epedori abuchun analiel?

⁴⁹Ekapolon, nyaanu ngakiro na kolong edodiunito amina kon na nyedaun? Nyaanu ngakichikakinet na kolong ichikakini iyong Daudi?

⁵⁰Ekapolon, kitamu eger lo eyenyere ekasuban etich kon, ka eger lo anaikinitor ekiyeny alu nyikiyenete iyong.

⁵¹Ekapolon Akuj, iyenyete ngimoe kon ekapolon kon loseuna! Iyenyete ngesi ani elosi kadaang.

⁵²Kipuroe Ekapolon Akuj jik! Aamen! Aamen!