Read turkana Ngieosio 9 Bible Online

Ngieosio 9 - turkana bible

Ngieosio 9

¹(Eeos a Daudi) Ekapolon Akuj, kepuruuni ayong iyong a etau kang kadaang. Alimori ayong ngakiro nakailiilok na isubak iyong daang.

²Aeokini ayong alakara kotere iyong. Aeokini ayong kekusi iyong, Akuj na Ipol Noi.

³Na areatar ngimoe kang tobongosi, apot tadakaros totoaka alongaren kon.

⁴Kiweik iyong ayong kiinak na eteniyete. Iboikin iyong lokicholong lo a apolou, totub ngakiro a ateneanut.

⁵Ikilak iyong ngibukui luche, tomunya luaronok. Itongopia iyong kesi jik.

⁶Adaunosi ngimoe kosi jik, angopiasi. Ibwang iyong ngirerea kech, nyeringa nabo kesi ekachitae jik.

⁷Nakaneni erai Ekapolon Akuj ekapolon jik. Ewaak ngesi ekicholong keng lo a apolou kotere akitub ngakiro.

⁸Etubi ngakiro a ngakwapea a eger alo etenoono. Etubi ngesi ngakiro a ngibukui a eger alo eriyan.

⁹Ekapolon Akuj ngesi emechi itwaan ni ichiakiaritae. Ngesi emechio ngirwa lua ngichan.

¹⁰Ekapolon Akuj, lu elimorito ekiro kon, kigienosi iyong. Nyichakari iyong itwaan daang ni kisaki iyong.

¹¹Kipuruutu Ekapolon Akuj na epolokinit Sion! Tolimokisi ngibukui daang ngakiro na asubi ngesi.

¹²Itamunit Akuj lu eboliare. Nyimuriakini ngesi akigoro alu eremitoe.

¹³Ekapolon Akuj, kisienoi ayong! Kingolik aboliaro nakaboliatar ngimoe kang! Ekapolon Akuj, toutunoe ayong anakitu,

¹⁴atolimorea ekipur kon alongaren ngitunga a Yerusalem, kekut iyong ani kiyuunea.

¹⁵Aboka ngibukui akipany tachakakinos kesi ngikulepek tooma. Erum kesi eloit kech a ngikulepek.

¹⁶Edodiun Ekapolon Akuj kotere ngakiro na ateneanut atubuni ngesi. Ani ngitunga luaronok, irumi kesi ngikulepek eboyor kech loaronon.

¹⁷Edaikinosi luaronok daang nakitu. Ikokinete ngitunga daang lu engerito Akuj neni.

¹⁸Nakaneni lu etingito ngichan nyimurianakinosi jiik. Nyengopiari akigieno alukebootok jik.

¹⁹Tonyou Ekapolon Akuj! Nyiimiek itwaan iwoga. Tochunakin ngibukui ngaren kon totubok kesi ngakiro.

²⁰Kitoem kare kesi, Ekapolon Akuj. Toyena atamar nyikirai kesi ichebore pearai kirai ngitunga.