Read turkana Ngieosio 94 Bible Online

Ngieosio 94 - turkana bible

Ngieosio 94

¹Ekapolon Akuj, irai iyong Akuj na etachanakini ngakiro, kidodiu angoit kon!

²Tonyou akeriran ngitunga daang, kirirak lukenisak kimadasi ibore ni esakete.

³Ejakaanete luaronok tanang ori? Ekapolon Akuj, ipuruunosi kesi tanang ori?

⁴Inisasi luaronok tanang ori, iwogasi kotere naaronok esubete?

⁵Ekapolon Akuj, eriasi kesi ngitunga kon, ichiakiarito lu eraakasi ngikon.

⁶Earete kesi ngapuseru ka ngikokiok ka ngitunga a akwap anache lu elomito nakwap yok.

⁷Abe ebalasi kesi, “Nyitee Ekapolon Akuj. Nyeyeni Akuj a Isirael.”

⁸Ngitunga kang, ikokinete esi ibangaakearosi noi kona ai? Etige ngikabangabangae, iosunete esi ori?

⁹Akuj na kolong adupakini akit, ikwa nyepupi a? Akuj na kolong asubakini akongu, ikwa nyitee a?

¹⁰Ngolo erionokini ngibukui, ikwa nyirirae a? Ngolo itatami ngitunga, ikwa nyeos a?

¹¹ Eyeni Ekapolon Akuj ngakiro na itamete ngitunga. Eyeni atamar eraakasi ngapasiek.

¹²Ekapolon Akuj, epiaritae itwaan ni irionokini iyong. Epiaritae itwaan ni itatami iyong etal kon!

¹³Isienguni iyong ngesi ngirwa lua ngichan, tobokakinitetei luaronok akipany.

¹⁴Nyeisikini Ekapolon Akuj ngitunga keng, nyimuriakinete ngesi lu eraakasi ngikeng.

¹⁵Kainyo ebongokinete ngesi ngakiro na eriyan, toweikis ngitunga daang lu etenooko.

¹⁶Ngae kengarakinit ayong akitopeg itwaan niaronon? Ngae ebakit alowae kang kitopeg luaronok?

¹⁷Arai nyekengarak ayong Ekapolon Akuj, kaberakina kolong ayong alosit lokatoak.[30]

¹⁸Ekapolon Akuj, na alimunio ayong atama, “Acheretaar akeju kang”, abu amina kon na nyedaun kegang ayong.

¹⁹Nakariebeta ayong ngakiro etau kesialolong, ibu iyong kisililing ayong atalakar.

²⁰Nyipuposi iyong ka ngikatubok ngakiro lukamodeanak, lu irokete ngitalio lukitojoket na nyeriyan.

²¹Epupokinosi kesi amunyar lu etenooko, todungut atamar taara ngitunga lu nyesechito.

²²Nakaneni Ekapolon Akuj erai ekaean kang, Akuj kang erai ataaba na amechi ayong.

²³Irirae Akuj kesi kotere aronis kech, emunyari kesi kotere ngasechesea kech. Ee robo, Ekapolon Akuj, Akuj yok, emunyari kesi.