Read turkana Ngieosio 95 Bible Online

Ngieosio 95 - turkana bible

Ngieosio 95

¹Potu epuruutu Ekapolon Akuj! Atoeokisi ataaba a ayuuno yok, kilakara!

²Atolomasi ni eyei ngesi a ngieosio alu kibuakinitor alakara, atoeonokisi ngieosio lu ekipur.

³Kainyo erai Ekapolon Akuj, Akuj na epol, ekapolon lo epol noi idwangit ngakujo daang.

⁴Epolokinit ngesi akwap daang, napei anadipoe tanang naitae a ngimoru.

⁵Erai anam akeng kainyo ngesi kolong asubi. Tani akwap nakoonon dang, ngesi kolong asubi.

⁶Potu ejuruoto elipa, atoriediko alongaren Akuj Akasubunan yok!

⁷ Erai ngesi Akuj yok, ataraakas ngoni ngitunga lu echoikinit ngesi. Kirai ngoni ngamesekin keng. Topupok akolongit naga ngakiro na elimunit ngesi ebala,

⁸“Nyiichanaketa loger lokolong echanaketa taapaakus alo Meriba, loger lo ekokineta neni akolongit ngina anariet ana enyaritae Masa.

⁹Apot taapaakus keningo ayong kaina katoroa, tarai sek aanyungarito ngakiro na asubea ayong kesi.

¹⁰Katakadakis kesi ayong a ngikaru a ngitomwon-omwon. Atolim ayong atama, ‘Iteni dir, ibatara ngitunga lugu! Awout kesi akiwap ngitalio kang.’

¹¹ Abu ayong ekong anangoit kang atama, ‘Nyilomarete esi jik nakwap na adikino ayong kesiangarea esi.’ ”