Read turkana Ngakamatak 1 Bible Online

Ngakamatak 1 - turkana bible

Ngakamatak 1

¹ Ngakamatak a Solomon alo arai lokookeng a Daudi, tarai ekapolon a Isirael.

²Eraakasi nugu ngakamatak, na itaanyunete ngitunga aosou, ka ngakitatamet naajokak, ka achoiar ekiruor ngakamatak.

³Itatamete kesi toosokioto anakiro ana esubete, ka amuno, ka ateneanut ta ajokis.

⁴Itoosunete itwaan ni emam ibore eyeni, nabo kitatama ngisorok aosou.

⁵Iatakinete tani aosou alokoosok, nabo kitaanyut lu isomato ekunonoonu,

⁶sodi toyeneta ngakamatak ka ngakitadapet, ka ngakiro nakaagongok iruorosi ngikoosok.

⁷ Akiker Ekapolon Akuj ngesi erai akisiakin a achwaanu.[1] Imenyarito lubaang aosou, nabo engerito akitatamo.

⁸Lokoku, kiira ngakiro a apakon, wara nyiinger ngakitatamet a itiokon.

⁹Kainyo itojokete kesi eboyor kon, loger lo isubusea achaat akou, kisubus akoromwae emosiring.

¹⁰Lokoku, ani kiningete ngikasechak, nyiicham ngakiro kech.

¹¹Ani ketamasi “Bua. Atoperutu itwaan ataara! Bua etijikisi lu nyesechito ataara pas!

¹²Potu elikosi kesi eyarete loger lo ilikorea aliel, elikosi elemwaaka loger alu echakakinosi nakipany!

¹³Kianyuni ngoni ebari daang, eleleba ngawiyei yok a ngiboro alu kingatari!

¹⁴Bua emorikin, atomora ibore ni kingatari.”

¹⁵Lokoku, nyiruko ka ngitunga ngulu. Tochoite ichieki ngirotin kech.

¹⁶Edodor ngakejen kech anakiro anaaronok, esadito jiik abukor ngaakot.

¹⁷Erai pas alokakin eloit, itee ikeny ni esakio akisurum.

¹⁸Nakaneni ngitunga lu ikote ngulu, elokakinito eloit lo isurumi kesi ngikulepek, eloit lo eari kesi ngikulepek.

¹⁹Ngolo erai esal alu esakete akidem ngitunga ngiboro. Eari erukoonu ngirukooi ngikulepek.

²⁰ Topupok! Enyaritoi aosou alorotin ka nigielanaret ngiboro,

²¹enyar irema alodorin a ngirerea ka nicha echunakina ngitunga daang ebala,

²²“Ngikabangabangae! Isakete esi aliwor ngikabangabangae tanang ori? Imenyete ngikemenyak tanang ori? Eremokinosi lubaang achwaanu tanang ori?

²³Topupokinae nakekilakinea, ketatami ayong iyong naajokak, katokorak achwaanu kang.

²⁴Ani aloger kanyaraa, kitonger, kebak akan kanyarit, towou akiirar,

²⁵nyimisit ngakitatamet kang, nyisaki akitenikino kang,

²⁶ani kikok neni, kakianar ayong dang iyong imini lochan. Kajamuari nakitingeta naketubulok,

²⁷nakitikokinotor loger a ekuwam aloapolon, na eponeta ngichan loger a ekuwam alo ipiripiri, nakitingea apipilu ka ariaba.

²⁸Sodi tanyara iyong aosou, nakaneni nyekii ayong. Kitasak iyong ayong wadaang, nakaneni nyikianyuni.

²⁹Kainyo iremokin kolong iyong achwaanu, towou akiker Ekapolon Akuj.

³⁰Inger iyong ngakitatamet kang, nyiimisik ngakikilakinet kang daang.

³¹Kotere nguna, ianyuni na itemem ka nguna isubi, kitobelasi ngakiro kon a ilope.

³²Etoakeenete lu emam ibore eyenete kainyo engerito aosou. Ngileleny kech a ngikulepek kesi emunyarete ngikabangabangae.

³³Nakaneni ngini iirari ngakiro kang, iboikin akaalimon. Emam ibore etapi ngesi. Nyeemi ngesi naaronok.”