Read turkana Ngakamatak 10 Bible Online

Ngakamatak 10 - turkana bible

Ngakamatak 10

¹Eraakasi nugu ngakamatak a Solomon. Italakari ikoku nikooson apakeng, nakaneni isialolongi nibaang itiokeng.

²Ebari lo eanyunio alorukoonu, emam ibore ajokon eyei, nakaneni ateneanut ngesi kiyuuni anakitu.

³Nyimianakini Ekapolon Akuj lu etenooko enyami akoro. Nakaneni iratakini luaronok nyeanyut ibore ni imuit.

⁴Kitiliwori akalanyanut ekebootonit nakaneni kitiliwori aturonu ekabaran.

⁵Itwaan ni echuni ngirwa lu elemere, eos. Nakaneni ni eperi ngirwa lu elemere, eyauni ngileech.

⁶Epiario itwaan ni etenoono, nakaneni akituk a itwaan aniaronon, idait amoitanut.

⁷Erai akitamun lu etenooko apiaro, nakaneni ebosiari ekiro a itwaan aniaronon.

⁸Iwapi itwaan nikooson ngakitatamet, nakaneni inyasunio ekabangabangat lo ingamangama.

⁹Elosi ni etenoono akaalimon, ani ni emodeana, irumunio.

¹⁰Ngini irapirapi ngakiro na iteni, eyaunit ngichan. Ani ngini ikilakinit aronis, eyaunit ekisil.[4]

¹¹Akituk a itwaan aniajokon, erai eitanit a akiyar. Ani akituk a itwaan aniaronon, idait amoitanut.

¹² Ikurukuruni arem eburas, nakaneni imuki amina ngasechesea daang.

¹³Iruorosi ngitunga lukoosok ngakiro naayarak, nakaneni ejoikinit lubaang inapio.

¹⁴Eanyunete lukoosok aosou daang, ani ingamangamakini ekabangabangat, taapuut ngichan.

¹⁵Iyoki ebari lukabarak, inyasuni eboot lukebootok.

¹⁶Ebachit anaajokak ngesi akiyar, ebachit anaaronok ngesi akisech.

¹⁷Itwaan ni iirari akitatamo, elosi nakiyar. Ngini engeri akikilakino, ibatar.

¹⁸Eliokono itwaan ni iweit arem keng. Ebangaana itwaan ni irit ngiturum.

¹⁹Ani kitalala iyong ngakiro, nyengopi akisech alokiruor kon. Nakaneni ani kios iyong, kiapak akituk.

²⁰Ikwaan ngakiro a itwaan aniajokon ka akwangat naasegan. Eraakasi ngakiro a itwaan aniaronon ngapasiek.

²¹Ingarakini akituk a itwaan aniajokon lukaalak, nakaneni eareene abaangu lubaang.

²²Apiaro a Ekapolon Akuj kitabari, nabo nyiatanakin akialolong.

²³Itisibit ekabangabangat akisech abolia. Ejoikinit itwaan nikooson akisub ngakiro na aosou.

²⁴Eanyunete lu etenooko ibore ni esakete. Ani luaronok taanyut ibore ni eemito.

²⁵Napei ekutunea ekuwam, tongopiasi luaronok, nakaneni nyingunguakinosi lu etenooko.

²⁶Tochoite imeari itwaan nikatumaanan, kikadakini ngesi iyong loger a emuna alokaabaran alokel kon, kori loger a apuru anakonyen kon.

²⁷Toker Ekapolon Akuj kiatakin ngikaru kon. Nakaneni ekidiokuunete ngikaru aluaronok.

²⁸Edaikin akigieno a ngitunga aluaronok nalakara. Itwaan niaronon, nyeanyuni ibore ni imuit.

²⁹Erai Ekapolon Akuj awas nakaagongon, alotunga alu etenooko, nakaneni emunyari luaronok.

³⁰Nyitwarakinio lu etenooko jik anakwap, ani luaronok, nyiboikinosi nakwap.

³¹Iruoro itwaan ni etenoono ngakiro na aosou. Nakaneni etuborio angajep, na elakakinit ngakiro naaronok.

³²Eyeni akituk a itwaan ani etenoono ngakiro na echamitae. Ngakiro naaronok itorunito nakituk a ngitunga aluaronok.