Read turkana Ngakamatak 12 Bible Online

Ngakamatak 12 - turkana bible

Ngakamatak 12

¹Itwaan ni emina arikino, emina aosou. Ebangaana itwaan ni engerit akikilakino.

²Emina Ekapolon Akuj itwaan niajokon. Eremokino Ekapolon Akuj ngulu etukosi naaronok.

³Nyitowei aronis itwaan kisikokin, nakaneni isikokinosi lu etenooko.

⁴Inisar ekile aberu naajokon, ani aberu na ngileech ikoni ibore ni ebosit anakoyo a ekile keng.

⁵Itamete lu etenooko nguna eriyan. Eliokoko ngitunga luaronok.

⁶Ngakiro nakaarak, itorunito nakituk aluaronok. Nakaneni kiyuunete ngakituk alu etenooko.

⁷Edakarosi luaronok tasalut, tadaikin neni. Nakaneni erubete ngawiyei alu etenooko jik.

⁸Ipuruunio itwaan itemem ka aosou keng, ani nibaang kimenyarae.

⁹Ejok itwaan nipasit ni esubi etich kimuj, akidwang ngini eyenikinitae tanyamite akoro.

¹⁰Iyoki itwaan niajokon ngibaren keng, nakaneni emoitanikinit niaronon lukeng.

¹¹Itwaan ni etionikinit akitare amana keng, etingit akimuj nakaalan. Ebangaana ngini eneikina ngitichisio lu emam ibore eyaunito.

¹²Inyasun awas a itwaan aniaronon, Nakaneni ewaasi lu etenooko toruba.

¹³Elimorete itwaan niaronon ngakiro keng a ilope. Epuun ni etenoono alochan.

¹⁴Eanyuni itwaan ebachit, itemem ka nguna iruoro ta nguna esubi. Eanyuni nguna itemokino eanyuni.

¹⁵Itamit itwaan nibaang atamar, ejok elote keng. Epupi itwaan nikooson ngakitatamet.

¹⁶Na engoea ekabangabangat, atipei toyena ngitunga. Nyemisit itwaan nikooson ngiyeny.

¹⁷Itwaan ni iruoro nguna a iteni, itiriyani ngakiro. Itwaan ni iruoro alioko, isudi ngakiro.

¹⁸Ngakiro na ekoponokinoi alimun, ilijakinosi nitwaan towana loger a ekileng. Nakaneni kitangalekinete ngakiro a ngitunga alukoosok.

¹⁹Nyengopiarete ngakiro na iteni jik, nakaneni ipuripuriakin alioko atipei.

²⁰Eyei amodeanut lotunga lu irokete naaronok. Elakarosi ngulu esubete naajokak.

²¹Emam naaronok eanyunotor lu etenooko, nakaneni etia ngichan aluaronok lobil.

²²Eremokino Ekapolon Akuj ngikaliokok. Elakara ngesi kotere lu emunoi.

²³Ililingea itwaan nikooson aosou keng, nakaneni elimori nibaang abaangu keng.

²⁴Ani kitionik iyong etich, iliwor ekapolon. Ani kikalanyaner, iliwor ekedalan.

²⁵Esuri akialolong etau a itwaan, nakaneni italakarete ngakiro naajokak.

²⁶Itenikini itwaan ni etenoono elote alopae keng. Iwapi itwaan niaronon erot lo echakari ngesi.

²⁷Nyeanyuni itwaan nikalany ibore ni esaki. Ebari itwaan ni etionikinit etich.

²⁸Kiriki ateneanut nakiyar. Kiyaari aronis nakitu.