Read turkana Ngakamatak 14 Bible Online

Ngakamatak 14 - turkana bible

Ngakamatak 14

¹Eduki aosou[7] akai keng, nakaneni eyatari abaangu a ngakan keng a ilope.

²Ekerit itwaan ni etenoono Ekapolon Akuj, nakaneni imenyarit ni ibatara Ekapolon Akuj.

³Iruoro itwaan nibaang ngakiro nakaalak kotere ekinis keng. Ani ekooson, echoikina alokiruor keng.

⁴Ni emam ngimongin echilere ngamanat, nyepete ngalemet. Ani eyakasi ngimongin, ilelebunosi ngalemet.

⁵Ekaanyunan lo emunoi, iruoro ngakiro na iteni. Ekaanyunan lo nyemunoi, isudi alioko.

⁶Nyepedori itwaan nia ngimeny aanyun aosou, tani kesak. Nakaneni ebeben itwaan nikachwaan aosun.

⁷Tachadar alokabangabangat kainyo emam ngakiro kayarak kitatami ngesi iyong.

⁸Eos itwaan nikachwaan kainyo eyeni ngakiro na esubi. Ebangaana ekabangabangat kainyo itamit atamar kori ayeni.

⁹Nyemisito lubaang tani kesubakis akisech, nakaneni esakete lu etenooko arimakino.

¹⁰Erai alakara kon, akon a ilope. Erai apipilu kon, akon a ilope. Emam itwaan imoreta iyong.

¹¹Inyasunio akai a itwaan aniaronon ani akai a itwaan ani etenoono, isikokin.

¹² Eyei erot lo esibit anitwaan ejok, tarai esal keng ngesi akitu.

¹³Idait tani akiana esinyoi, ani edaun alakara, kisiak akialolong.

¹⁴Eriamuni itwaan niaronon nguna itemem ka aronis keng. Eriamuni itwaan niajokon ebachit a ngitichisio keng.

¹⁵Enupi ekabangabangat ngakiro daang. Nakaneni itee itwaan nikooson ni itorit.

¹⁶Echoikina itwaan nikooson ereeun anakiro anaaronok. Ekoponokin itwaan nibaang ngakiro, nyetitinyikini.

¹⁷Esubi itwaan nikangoan abangaanut, nakaneni etitinyikini[8] itwaan nikooson.

¹⁸Eriamunete ngikabangabangae nguna itemem ka abangaanut kech. Ebachit lo eriamunete lukachwaak ngesi aosou.

¹⁹Epote luaronok kijuuruoto alongaren luajokak, towaa alodorin a ngitunga alu etenooko.

²⁰Ekadakinit ngitunga daang ekebootonit, ekadakinit tani ekidunyet keng. Nakaneni elalak ngipaalon a ekabaran.

²¹Ngini imenyarit ekidunyet keng, erai ekasechan. Epiaritae ni epatana alokebootok.

²²Ngulu irokete naaronok, asech. Ngulu irokete naajokak eriamunete amuno ka ekipur.

²³Tosub etich taanyunea ibore ni iyarea. Ani kiboikin iyong tadakakin ekiruor bon, iliwor ekebootonit.

²⁴Ebachit a ngikoosok ngesi ebari. Eyenio ngikabangabangae a abaangu kech.

²⁵Eyuuni ekaanyunan lo iruoro iteni ngitunga. Ngolo iruoro alioko, ewani ngitunga.

²⁶Akiker Ekapolon Akuj itogogongi itwaan, nabo toyuu Akuj ngesi ka awi keng.

²⁷Akiker Ekapolon Akuj ngesi erai eitanit a akiyar, sodi totiakas itwaan ka eloit a akitu.

²⁸Ipuroi ekapolon itemem ka alalau a ngitunga alu epolokinit ngesi. Ani emam ngitunga, emam ngesi ekipur.

²⁹Eos itwaan ni nyengoyeene atipei, nakaneni itwaan ni engoyeene atipei, idodiunit abangaanut keng.

³⁰Itojokete ngitamen luajokak akwaan, itobosi etereku ngakoyo.

³¹Itwaan ni ichiekiarit ngikebootok, imenyarit Akuj na kolong asubi kesi. Ani kepataner itwaan alokebootok, ekerit ngesi Akuj.

³²Ebukorosi ngitunga luaronok make, kotere ngakiro naaronok esubete kesi. Iyoki ngitunga luajokak ateneanut[9] kech.

³³Eyei aosou lotamen a itwaan anikachwaan. Nakaneni nyeyenete[10] ngikabangabangae tani ni erai ayenut.

³⁴Einakini ateneanut akwap ekipur, nakaneni erai akisech ngileech alobukut kadaang.

³⁵Italakari ekasuban etich lokooson ekapolon, ani ngolo eyaunit ngileech, enyunyurikin ngesi.