Read turkana Ngakamatak 15 Bible Online

Ngakamatak 15 - turkana bible

Ngakamatak 15

¹Ngakiro na iapunitae etachunio, isinacharete anyunyura. Ikurukuruunete ngakiro nakaapilak angoit.

²Itojokete ngakituk a ngikoosok achwaanu, itorunit abaangu nakituk a ngikabangabangae.

³Itee Ekapolon Akuj wadaang, itee naaronok ka naajokak.

⁴Eyaunete ngakiro naajokak akiyar, ipirisaarete ngakiro nakamoitanak etau.

⁵Imenyarit itwaan nibaang ngakitatamet a apakeng. Eos itwaan ni echamuni arikino.

⁶Erubi ebari a itwaan ani etenoono nakaneni isunyar ebari aluaronok na eponeta ngichan.

⁷Ngitunga lukoosok epetarito achwaanu, meere ngikabangabangae.

⁸Eremokino Ekapolon Akuj ngakipeyos a ngitunga aluaronok, nakaneni emina ngesi akilip a ngitunga aluajokak.

⁹Eremokino Ekapolon Akuj eboyor a ngitunga aluaronok, nakaneni emina ngulu esubete na etenooko.

¹⁰Itwaan ni esubi naaronok irirao lokojokon. Etoani itwaan ni engerit arikino.

¹¹Itee Ekapolon Akuj tani ni eyakasi ngikatoak, ikokini itwaan iweyi ngitamen keng ani a Akuj ai?

¹²Nyesaki ekewogan akikilakino, nyelosi lokooson kitatamae.

¹³Na elakaror itwaan, tamaisan. Itwaan ni ialolongi, esinyit.

¹⁴Esakete ngitunga lukoosok akitatamo, eupit ngikabangabangae abaangu.

¹⁵Erono eboyor alotunga alu a ngichan jiik. Ani alotunga alu elakara, ejok eboyor anikech jiik.

¹⁶Ejok aliwor ekebootonit tokerite Ekapolon Akuj, akidwang araakau ekabaran toyei lochan.

¹⁷Ejok akinyam ngakui ani eyei amina akidwang akinyam itaok niatuman ani eyei arem.

¹⁸Ikurukuruuni itwaan nikangoan eburas, nakaneni eyauni ni nyengoana ekisil.

¹⁹Eriamuni itwaan nikalany ngichan awadaang, emam itwaan ni etenoono ngichan eanyuni.

²⁰Italakari idia ni eos apakeng, nakaneni imenyarit ekabangabangat itiokeng.

²¹Italakarit ngikabangabangae abaangu kech. Esubete lukoosok ngakiro na iyookino.

²²Ani emam ngikesuruorok, nyesubakin ngakiro na eretae. Ani elalak ngikesuruorok, tosubakinos.

²³Ejok noi alimun akiroit na iyookino, alosaa alo esakitere.

²⁴Iwapito ngitunga lukoosok erot lo elosi kidiama nakiyar, meere erot lo elosi kwap lokatoak.

²⁵Inyasuni Ekapolon Akuj awi a itwaan ani inisa, nakaneni iratakini ngiboro a apuserut.

²⁶Eremokino Ekapolon Akuj ngitamen a ngitunga aluaronok. Ejoikinito ngesi ngakiro a ngitunga alu ikiuna.

²⁷Itwaan ni erorokona, ni esaki angatar ibore ni nyerai ikeng, ilomakini awi keng lochan. Itwaan ni engerit ibore ni ediakare, eyari.

²⁸Itamakini itwaan nikooson akiroit eringa nyetachuna. Akituk a itwaan aniaronon, ekoponokin atulakany ngakiro naaronok.

²⁹Elona Ekapolon Akuj ani eyakasi luaronok, nakaneni iiranari akilip alu etenooko.

³⁰Italakari ereet lo elakuna etau, epwatunete ngakiro naajokak akwaan.

³¹Itwaan ni iirari ngakiro na erikinitere, irukete ka ngikoosok.

³²Itwaan ni engerit ngakitatamet, imenyara bon. Ngini echamuni arikino, eosuni.

³³Erai akerit Ekapolon Akuj akitatama aosou. Akitiditeun ngesi ingareni ekipur.